Ահաբեկչական անցյալով հայտնի ուժը հիմա էլ որոշել է պարտիզանական մարտեր մղել պետության դեմ․ ՏԵՍԱՆՅՈՒԹ

Նախօրեին հայտնի դարձավ, որ արտախորհրդարանական ուժերից մեկը ներքին շրջաբերական է տարածել երկրում պետության դեմ պարտիզանական մարտեր տանելու վերաբերյալ: Նորանկախ Հայաստանի պատմության առաջին փուլում իր ահաբեկչական անցյալով հայտնի այդ ուժը հիմա էլ որոշել է պարտիզանական մարտեր մղել պետության դեմ, իշխանության առանձին կառույցների դեմ: Այս մասին ԱԺ-ում ասաց պատգամավոր Արման Բաբաջանյանը։

«Կարծում եմ, որ ԱԺ-ն պետք է անմասն չմնա այսպիսի երևույթներից, մենք պետք է մեր գնահատականը տանք, որովհետև վերջնարդյունքում, կարծես թե, թիրախը ԱԺ արտահերթ ընտրություններն են, և բոլոր խմբակցությունները պետք է իրենց վերաբերմունքը հայտնեն: Մենք շատ լավ գիտենք՝ այդ ժողովը վարած Հրանտ Մարգարյանն ինչով էր զբաղված 90-ականների սկզբին, երբ թմրանյութ էր տեղափոխում, և այդ գործողությունները ղեկավարում էր Դավիթ Շահնազարյանը, որը հիմա միացել է այդ նույն խմբակին: Եվ չպետք է մոռանանք, թե «Դրո» կառույցը, «31-ի գործը» ինչի մասին էին, և թե Հոկտեմբերի 27-ի ոճրագործներն ինչ կապ ունեին այդ ուժի հետ»,- ասաց Բաբաջանյանը։

Վերջինս կարծում է, որ բոլորը պետք է մեր զորակցությունը հայտնեն «Նիկոլ Աղբալյան»-ի այն խիզախ երիտասարդներին, որոնք հաստատեցին, որ տեղի է ունեցել այդպիսի հավաք և այդպիսի հանձնարարություն՝ պետության դեմ «պարտիզանական» մարտեր մղելու։ «Պետք է հորդորեմ, որ այս կուսակցությունը, որը սփյուռքում ու հիմա էլ Հայաստանում մեդիայի ռեսուրսներն օգտագործում է աննկարագրելի թույնը թափելու համար Հայաստանի պետության և այս նոր փոփոխությունների դեմ, թող խելքները գլուխները հավաքեն, և ԱԱԾ-ն պետք է իր ուշադրության տակ առնի այս երևույթը: Մենք չենք կարող կրավորական կերպով հանդուրժել այսպիսի երևույթները»,- ընդգծեց Բաբաջանյանը:

Մանրամասները՝ տեսանյութում։