Մեր հարուստներն էլ Կենտրոնում հյուրանոց կսարքեին, դրա համար պետք չէ շեյխի ներկայացուցչին բերել. Վահագն Հովակիմյան. ՏԵՍԱՆՅՈՒԹ

Factor.am-ի հարցազրույցը ՀՀ ԱԺ «Իմ քայլը» խմբակցության անդամ Վահագն Հովակիմյանի հետ

-Պարո՛ն Հովակիմյան, երեկ կալանավորվել է հեղափոխության կադրը՝ կրթության, գիտության, մշակույթի և սպորտի փոխնախարար Գևորգ Լոռեցյանը։ Ինչպե՞ս եք մեկնաբանում այս փաստը։

-Պարոն Լոռեցյանը ոչ թե կալանավորվել է, ձերբակալվել է: Ինձ համար շոկային լուր էր, մեկնաբանելու բան չկա: Իրավապահները թող քննսեն։

-Դուք ծանո՞թ էիք նրան:

-Իհարկե՛, մենք ընկերներ ենք։ Դրա համար եմ ասում՝ ինձ համար շոկային տեղեկություն էր։ Բայց ասել ենք, ասելու ենք՝ ով ինչ անում է, իր արածի համար պետք է պատասխան տա, կապ չունի՝ այսօր է արել, երեկ է արել, թե վաղն է անելու:

-Ձեր կարծիքով՝ ինչո՞ւ մոտ 1 միլիոն դրամ աշխատավարձ ստացող պաշտոնյան, որը նոր արժեքներով է եկել իշխանության, ըստ մեղադրանքի՝ չդիմացավ գայթակղությանը։

-Քանի որ չեմ տիրապետում նախաքննության նյութերին, մինչև չհրապարակվի…

-Նկատի ունեմ՝ մարդկային տեսանկյունից։

-Այնպիսին, ինչպիսին ճանաչում եմ, հաստատ չէր կարող այդպիսի բան անել։ Բայց փաստը մնում է փաստ, նա ձերբակալվել է և ներկա կարգավիճակով կասկածվում է։ Դրա պատասխանը պիտի տա նախաքննական մարմինը։ Կներեք, բայց մարդու էությունն այնպիսին է, որ նա կարող է փոխվել։ Այստեղ կարող եք հոգեբանների ուսումնասիրությունները նայել և կռահել, թե ինչ է տեղի ունենում։ Ցավալի, վատ բան է եղել, բայց փաստը մնում է փաստ։

-Երկու օր առաջ «Բարգավաճ Հայաստան» խմբակցությունը բոյկոտեց խորհրդարանի նիստը այն պատճառով, որ Ալեն Սիմոնյանն ասել էր՝ դուք քանի՞ գլխանի էիք, որ Փաշինյանին չընտրեիք վարչապետ։ Ինչպե՞ս եք գնահատում Ալեն Սիմոնյանի արտահայտությունը և ԲՀԿ-ի այդ քայլը։

-Ալեն Սիմոնյանն ինչո՞ւ ասաց։ Նա ասաց՝ հայ ժողովրդի կամքը չկատարե՞ք։

-ԲՀԿ-ն մինչ այդ ասել էր, որ մենք չլինեինք, դուք չէիք կարող ընտրել վարչապետ։

-Դա եղել է մայիսի 8-ի ընտրություններին: Այդ օրը նույնիսկ նախկին իշխանությունները պարտավորվեցին ապահովել վարչապետի ընտրությունը, որպեսզի ժողովրդի ցասում թույլ չտան, որպեսզի մարդիկ իրենց զայրույթը զսպեն։ ՀՀ ժողովրդի կամքը չկատարող որևէ քաղաքական ուժ, անհատ չի կարող լինել։

-Հետևաբար՝ Ալեն Սիմոնյանի ասածը ճի՞շտ էր։

-Այո՛, Ալեն Սիմոնյանն ասում էր՝ դուք ոչ թե մեզ եք լավություն արել, այլ ժողովրդի ցանկությունն եք կատարել։ Եվ այդտեղ չէիք կարող չկատարել։

-Իսկ ԲՀԿ-ի բոյկո՞տը։

-Դե՝ այնտեղ քաղաքական սուր բանավեճ էր գնում։ Եվ վերջում նրանք այդպես որոշեցին։

-Այդ բոյկոտն ազդե՞ց խորհրդարանի աշխատանքների վրա։

-Իհարկե՝ ոչ։ Ընդհանրապես, բոյկոտը ամենավատ քաղաքական քայլն է, որ արվում է: Դա կլինի այս դեպքում, նախկինում էլ: Բոյկոտը ոնց որ մարտի դաշտից փախչելու պես մի բան է, այն անարդյունավետ է։ Եթե համոզված չես, որ բոյկոտով քաղաքական գործընթացը քեզ համար շահեկան ձևով ես տանելու, այլ նեղացվածի կեցվածքով հեռանալու ես, իր մեջ դրական բան չունի, խնդրի լուծում չի տալու։

-Բոյկոտը ծնվեց Ծառուկյանի հրավիրած Աբու Դաբիի ներդրողների հանդեպ քաղաքապետի վերաբերմունքին «Իմ քայլի» տված գնահատականներից: Ըստ Ձեզ, այնուամենայնիվ, Աբու Դաբիից այդ ներդրողներին հիասթափեցնելը վատ չի՞ անդրադառնում Հայաստանի ներդրումային միջավայրի վրա։

-Ես կարծում եմ՝ վերջին երկու օրերին այդ պատմության հետ կապված այլ մանրամասները, որոնք ներկայացվեցին, բոլորի համար պարզ էր, թե ինչ է կատարվել։ Հայաստանում, երևի, հարյուրավոր ձեռներեցներ կգտնվեն, որոնց եթե Կենտրոնում, մայրաքաղաքի ամենասրտում տարածք տան, իրենք բիզնես կհիմնեն։ Հյուրանոց էլ կսարքեն, հիվանդանոց էլ կսարքեն։

-Այսինքն՝ դրա համար պետք չէ թագաժառանգ լինել։

-Այո՛։ Համոզված եղեք, Հայաստանի 1000 ամենախոշոր հարկատուներից առաջին հարյուրին եթե ասեք, որ Երևանի քաղաքապետարանը ձեզ Կենտրոնում տարածք տրամադրի, դուք հյուրանոց կսարքե՞ք, թե՞ չէ, կամ, ասենք, ժամանակակից հիվանդանոց: Քաղաքի կենտրոն, ամենաթանկ տեղում… Մեր խոշոր հարկատուների կեսը կհամաձայնվի։ Դրա համար պետք չէ աշխարհի կեսը գնալ, բերել շեյխի ներկայացուցչի ներկայացուցչի ներկայացուցչին։

-Խորհրդարանում քննարկվում է ՍԴ անդամներին սոցիալական երաշխիքներով թոշակավորելու նախագիծը։ Եթե ՍԴ անդամները հրաժարվեն օգտվել ձեր առաջարկությունից մինչև հունվարի 31-ը, ի՞նչ է սպասվում նրանց և ի՞նչ կլինի նախագծի ճակատագիրը։

-Մեր քաղաքական մեծամասնության խնդիրը ոչ թե անպայման 100 տոկոսով համաձայնություն ստանալն է, այլ մեր խնդիրն է՝ լուծման ուղիներ առաջարկել, որովհետև կա ճգնաժամ։ Մեր խնդիրը լուծման ուղիներ առաջարկելն է:

-Իսկ եթե չեն համաձայնվում, հրաժարվում են…

-Այլ լուծման ուղիներ կառաջարկենք կամ մենք կնախաձեռնենք այլ լուծում: Ճգնաժամը կա, և այդ ճգնաժամը պետք է լուծվի։ Սահմանադրությունը դրա հնարավորությունն ընձեռում է։ Հիմա այս գործիքակազմն ենք ընտրել: Չլուծվեց, այլ տարբերակ կառաջարկենք, և դա ՀՀ շահն է պարտադրում։

-Վերջին օրերի ամենամեծ սկանդալը կապված էր, իհարկե, քաղաքապետարանին արված նվիրատվությունների հետ։ Խորհրդարանում այդ և ոչ միայն այդ հարցով քննիչ հանձնաժողով է ստեղծվում։ Դուք ողջունո՞ւմ եք դա։

-Իրականում ողջունելու խնդիր չկա, որովհետև այդ սկանդալի շուրջ քաղաքապետից սկսած՝ ընդհուպ մինչև վարչապետ, այդ խնդրի մասին խոսել են։ Մեր իշխանությունը ամենաշատն է շահագրգռված, որպեսզի կոռուպցիոն ցանկացած նշույլ, կոռուպցիայի հոտը չգա պետական համակարգից։

Հարցազրույցն ամբողջությամբ՝ տեսանյութում:

Մհեր Արշակյան