Եկեք ընդհանրապես փակենք էս կարգի մեքենաների ճանապարհը. Փաշինյանը՝ աջ ղեկով մեքենա ներկրելու մասին. ՏԵՍԱՆՅՈՒԹ

Կառավարության այսօրվա նիստին Տարածքային կառավարման և ենթակառուցվածքների փոխնախարար Բագրատ Բադալյանը ներկայացրեց նախագիծ, որով նախատեսվում է «Վերամշակում՝ ներքին սպառման համար» մաքսային ընթացակարգով բացթողնման համար թույլատրվող ապրանքների ցանկը լրացնել թեթև մարդատար ավտոմոբիլնեի տողով:

Նա ասաց, որ նշված մաքսային ընթացակարգը հնարավորություն կտա աջակողմյան ղեկային համակարգ ունեցող տրանսպորտային միջոցներն առանց վերասարքավորման ներմուծել Հայաստան ու իրականացնել աջակողմյան ղեկային համակարգի փոխարինում ձախակողմյան ղեկային համակարգով:

«Այնուհետև, մաքսազերծելուց հետո, դրանք հաշվառել ՀՀ ոստիկանությունում ու ազատ շահագործել ՀՀ տարածքում»,- ասաց նա:

Նիկոլ Փաշինյանը նշեց, որ իրենք ընդհանրապես արգելել էին աջակողմյան ղեկով մեքենաների ներկրումը, և ստացվել էր այնպես, որ բազմաթիվ քաղաքացիներ բերում էին ու Վրաստանի տարածքում աջակողմյանը փոխում ձախակողմյան համակարգով:

«Բայց ժամանակավոր ներկրման ռեժիմով կարող են բերել, ղեկային կարգավորումը փոխել, որից հետո հաշվառվի ու թույլատրվի շահագործումը: Պետք է արձանագրենք, որ այդ ընթացքում հնարավորություն չեն ունենալու շահագործել ու շահագործելու դեպքում տուգանքների խնդիր կբացվի: Եկեք պայմանավորվենք, որ մենք ընդառաջ ենք գնում, բայց չարաշահումների փորձ, հույս ունենք, չի լինի»,- ասաց Փաշինյանը:

Փոխվարչապետ Տիգրան Ավինյանն ասաց, թե կարծում է՝ պետք է քննարկել, ի վերջո՝ համաձա՞յն են, որ փոփոխված մեքենաները շարունակաբար ներկրվեն ու շահագործվեն Հայաստանում: Փոխվարչապետ Մհեր Գրիգորյանն էլ նշեց, թե պետք է հասկանալ՝ ինչ է կատարովւմ:

«Ես պարոն Ավինյանի հետ լրիվ համաձայն եմ: Մենք, ըստ էության, գեներացնում ենք վթարի պոտենցիալ օբյեկտ հանդիսացող շարժական գույքի ծավալներ Հայաստանում: Եթե մենք սերտիֆիկացիա չանենք, կպարզվի, որ վթաների մեծ քանակի պատճառը նրանում է, որ ղեկի տեղափոխությունն արվել է ոչ պրոֆեսիոնալ ձևով»,- ասաց Գրիգորյանը:

Տիգրան Ավինյանն իր հերթին հավելեց, որ պետք է նոր ժամկետ ֆիքսել, որից հետո ընդհանրապես աջակողմյան ղեկով մեքենաները չեն կարող շահագործվել:

«Եկեք պայմանավորվենք, որ այս խմբաքանակն էլ դուրս է գալիս, և ընդհանրապես փակում ենք այս կարգի մեքենաների ճանապարհը»,- ասաց վարչապետը:

ՊԵԿ նախագահ Դավիթ Անանյանի խոսքով՝ նախորդ տարեվերջին էլ են նման քննարկում արել ու ասել՝ «սա էլ ենք անում ու էլ չենք անում», բայց հիմա էլի վերադարձել են:

«Այսինքն՝ հիմա պարզ, պրիմիտիվ հարց են դնում. ասում են՝ Վրաստանի արհեստավորն այդքան փող է աշխատում, մեր արհեստավորին չե՞ք թողում աշխատի: Հիմա մենք որոշումը, փաստորեն, կիսատ ենք կայացրել և փողը Հայաստանից տեղափոխել ենք ուրիշ երկիր, վատ որոշում ենք կայացրել»,- ասաց վարչապետը:

Նա հորդորեց կոնկրետ ամսաթիվ որոշել, թե երբվանից են արգելում անգամ փոփոխված ղեկով մեքենաների ներկրումը ու այլևս նոր նախաձեռնություն չբերել: «Արագ է պետք անել»,- ասաց Փաշինյանը:

Մանրամասները՝ տեսանյութում:

Նարեկ Կիրակոսյան