Քաղաքականություն
05.12.2019 | 11:54Համայնքների խոշորացման ռեֆորմը հիշում ենք, թե ինչ արմագեդոններով կարողացավ Հանրապետական մեծամասնությունն անցկացնել։ Համայնքների խոշորացման որևէ հաջողված պատմություն չներկայացվեց։ Այս մասին ԱԺ-ում իր ելույթի ժամանակ ասաց «Բարգավաճ Հայաստան» խմբակցության պատգամավոր Նաիրա Զոհրաբյանը։
«Մենք լինում ենք խոշորացված համայնքներում ու նույն խնդիրներն առկա են։ Այս տարիների ընթացքում համայնքների խոշորացման մեկ հաջողված պատմություն դուք այդպես էլ չկարողացաք ներկայացնել, որպեսզի ասենք, այո՛, համայնքների խոշորացումը տվել է իր արդյունավետությունը։ Ինչ վերաբերում է տեղական հանրաքվեներին, որոնք չունեն իրավական արժեք, ես հիշեցնեմ՝ համայնքների խոշորացման հետ կապված, երբ Սյունիքի մարզում բդեշխության կարգեր էին իշխում, ժողովուրդը գնաց, 80 տոկոսով դեմ քվեարկեց, բայց թքեցին ժողովրդի կարծիքի վրա, էնտեղ կարգերը, հիշում եք, ինչպիսին էին, խոշորացումը տեղի ունեցավ։ Այստեղ բնակչությանը նվաստացնելու էլեմենտ կա։ Ասում ենք՝ կարծիքդ ասա, բայց հետո ասում են՝ էսպես է լուծվելու։ Առանց իրավական հետևանքի հանրաքվեները , հարցումները պետք է արգելվեն»,- ասաց պատգամավորը։
Հիշեցնենք, որ Ազգային ժողովում քննարկվում է Տեղական հանրաքվեի մասին Հայաստանի Հանրապետության օրենքում լրացումներ կատարելու մասին և Տեղական ինքնակառավարման մասին ՀՀ օրենքում լրացումներ կատարելու մասին օրենքների փաթեթը:
Մանրամասները՝ տեսանյութում։
