27.03.2025 | 14:52
Վարչապետի աշխատակազմից համառորեն չեն հայտնում՝ արդյո՞ք Նիկոլ Փաշինյանն ընդունել է մայիսի 9-ին Մոսկվա մեկնելու հրավերը
ՀՀ-ն և Արցախն այս տարի «Հայաստան» հիմնադրամին 1 մլն 822 հազար 732 դոլար են հանգանակել. Հայկակ Արշամյանը ներկայացրեց հեռուստամարաթոնի արդյունքները
Տնտեսություն
04.12.2019 | 14:40
«Հայաստան» համահայկական հիմնադրամի այս տարվա հեռուստամարաթոնի ժամանակ հանգանակության ռեկորդակիրը Ֆրանսիան է՝ ավելի քան 2 մլն 900 հազար դոլար: Այսօր հրավիրված ասուլիսում ասաց հիմնադրամի գործադիր տնօրեն Հայկակ Արշամյանը:
«Ֆրանսիայում հիմնադրամի շատ լավ ցանց կա: Բացի այդ՝ իրենք տարբեր շրջաններում մի քանի օր միաժամանակյա ֆոնետոն են անում, հեռախոսազանգերով կապվում են շուրջ 10 հազար մարդու հետ և խնդրում են գումարներ նվիրաբերել»,- ասաց նա:
Հայկակ Արշամյանը նշեց, որ, ընդհանրապես, հեռուստամարաթոնի ժամանակ հայտարարված, իսկ հետո հիմնադրամ մուտքագրված գումարների թվերը միշտ տարբեր են:
«Բավական շահարկվեց, թե ինչու ժամանակին 35 մլն էր հավաքվում հեռուստամարաթոնների ժամանակ, հիմա՝ 10 մլն: Կարող եմ նույնիսկ տարիներով ասել, օրինակ՝ 2008 թվականին 35 մլն դոլար է խոստացվել, բայց իրականում հիմնադրամ մուտք է եղել 10 մլն 884 հազար դոլար: Այսինքն՝ այդ 35 հայտարարելն ու իրական թիվը միշտ տարբերվել է»,- ասաց հիմնադրամի տնօրենը:
Ինչ վերաբերում է եվրոպական մյուս երկրներից հանգանակությանը, Գերմանիայից այս տարի հանգանակվել է շուրջ 72.704 եվրո, Հունաստանից՝ ավելի քան 26 հազար, Շվեյցարիայից՝ մոտ 20 հազար դոլար: «Մեծ Բրիտանիայից չնայած առաջին օրը 70 հազարի խոստում ստացանք, երեկ տեղեկացանք, որ ևս 250 հազար դոլարի խոստում կա: Այսինքն՝ Մեծ Բրիտանիայից գումարը դառնում է 220 հազար դոլար: Ընդհանուր առմամբ, Եվրոպան 3 մլն 360 հազար դոլարի գումար է հանգանակել»,- հավելեց Արշամյանը:
Մյուս համայնքներից Ավստրալիան այս տարի հանգանակել է 24.700 դոլար, Եգիպտոսը՝ 10.000, Բրազիլիան՝ 42.000, Արգենտինան՝ 94.000 դոլար:
«Հայաստանն ու Արցախը միասին այս տարի հանգանակել են 1 մլն 822 հազար 732 դոլար, «Տաշիր գրուպը»՝ 1.5 մլն, Պետերբուրգից Հրաչյա Պողոսյանը՝ 7.772 դոլար: Իսկ ԱՄՆ-ից խոստումները շուրջ 2 մլն 670 հազար դոլարի են: Այսպիսով՝ ընդհանուր գումարը, հայտարարված 9.8 մլն-ի փոխարեն, դարձել է 10 մլն 235 հազար 847»,- նշեց նա:
Հայկակ Արշամյանը նաև խոսեց հիմնադրամի որդեգրած քաղաքականության մասին, այն է՝ ապահովել հնարավորինս շատ մարդկանց մասնակցության հանգանակությանը: Վերջին երեք տարիներին մասնակցության առումով հետևյալ պատկերն է գրանցվել. 2017 թվականին «Հայ Փոստի», կարճ հաղորդագրությունների միջոցով հանգանակությունը և անհատների ու կազմակերպությունների մասնակցությունը հանգանակությանը կազմել է 3.240, 2018-ին՝ 5.994, իսկ այս տարի այդ թիվը հասել է 9.644-ի:
«Իսկ աշխարհում մասնակցությունը գրեթե միշտ նույնն է մնում՝ 20-22 հազար մարդ: Սակայն, օրինակ, ԱՄՆ-ում այս տարի, դարձյալ հեռուստամարաթոնի ժամանակ առցանց նվիրատվությունների գաղափարը խրախուսելու շնորհիվ, բավական բարձրացել է օնլայն նվիրատուների ցանկը: Այնպես որ՝ այնտեղ էլ այս տարի բավական լավ արդյունք ունենք»,- եզրափակեց «Հայաստան» հիմնադրամի գործադիր տնօրենը:
