Ինքնակամ շինությունն օրինակացվել է «Ալեքս ընդ Հոլդինգ»-ի կողմից տրամադրված աղբատար մեքենաների դիմաց. ՏԵՍԱՆՅՈՒԹ

Երևանի ավագանու «Լուսավոր Հայաստան» խմբակցության անդամ Դավիթ Խաժակյանն ուղիղ եթերի ժամանակ անդրադարձավ մի քանի հարցերի և տեղեկացրեց՝ բացահայտում է մի բան, որը մամուլում չի հնչել և չափազանց մտահոգիչ է իր համար։

«Իմ ձեռքի տակ է գտնվում քաղաքապետի որոշումը՝ վերնագրված «Մալաթիա-Սեբաստիա, Օհանով 15/1 հասցեում սեփականության իրավունքով քաղաքացի Շողերինա Մկրտչյանին պատկանող հողամասում գտնվող ինքնակամ կառույցի օրինականացնելու մասին։ Խոսքը գնում է 5842 քմ ինքնակամ կառույցի մասին, որը քաղաքապետն իր որոշմամբ օրինականացրել է։ Այս անուն-ազգանունը համապատասխանում է Սամվել Ալեքսանյանի կնոջ անուն-ազգանվան հետ, իսկ Օհանով փողոց 15/1 հասցեում գրանցված է «Երևան Սիթի» սուպերմարկետների ցանցը»,- ասաց Խաժակյանը։

Նրա տեղեկացմամբ՝ 5842 քմ ինքնակամ շինություն օրինակացվել է «Ալեքս ընդ Հոլդինգ»-ի կողմից տրամադրված 3 աղբատար մեքենաների դիմաց։

«Եվ եթե մենք նայենք ժամանակահատվածները, կտեսնենք, որ քաղաքացին դիմել է սեպտեմբերի 23-ին, և դա համընկնում է այն ժամանակահատվածի հետ, երբ քաղաքապետարանը ստացել է նաև աղբատար մեքենաները, որի արդյունքում իրականացվել է ինքնակամ կառույցի սեփականաշնորհումը։ 5842 քմ ընդհանուր մակերեսով տարածք կառուցապատելը մեկ օրվա բան չէ, և, փաստորեն, ամենահարմար ժամանակահատվածը սա էր։ Քաղաքապետարանն, այսպես ասած, ռեկետի միջոցով, ըստ էության, գործարարներին գործարք է առաջարկել՝ բերեք, ծառայություն մատուցեք, այդ մեքենաները տրամադրեք մեզ և դրա դիմաց մենք ձեզ կտանք այս շինթույլտվությունը»,- նշեց ավագանու անդամը։

Նա նաև ընդգծեց, որ այստեղ շատ կարևոր մի հանգամանք աչք է զարնել իրեն․ այս որոշումը, որի տակ ստորագրել է քաղաքապետ Հայկ Մարությանը, գրված է նոյեմբերի 4-ով, և սա այն ժամանակահատվածն է, երբ Հայկ Մարությանը երկրում չի գտնվել։

«Փաստորեն, ստորագրվել է որոշում, որը, բնականաբար, եղել է իր գիտությամբ։ Այդ օրվա մյուս որոշումները, երբ ուսումնասիրում ենք, տեսնում ենք, որ քաղաքապետի առաջին տեղակալ Հրաչյա Սարգսյանն է ստորագրել է, բայց այս մեկը քաղաքապետի բացակայության ժամանակ ստորագրվել է Հայկ Մարությանի անունից։ Փաստորեն, քաղաքապետը խախտել է բոլոր հնարավոր բարեվարքության նորմերը, գնացել է այսպիսի գործարքի, ամիսներ շարունակ թացքրել է բնակիչներից և ավագանու անդամներից»,- նշեց Դավիթ Խաժակյանը։

Մանրամասները՝ տեսանյութում։