Չենք խորշում Սամվել Ալեքսանյանից նվերներ ընդունելուց. Հայկ Մարությանի խոսնակ. ՏԵՍԱՆՅՈՒԹ

Երևանի «Լույս» խմբակցության ղեկավար Դավիթ Խաժակյանը հայտարարել է, որ քաղաքապետարանը «ԿամԱԶ»-ները նվեր է ընդունել Սամվել Ալեքսանյանին պատկանող «Ալեքս ընդ հոլդինգ» ընկերությունից, և դա արել է շինթույլտվությունների դիմաց: Այս հայտարարությունն այսօր հրավիրված մամուլի ասուլիսի ժամանակ մեկնաբանեց Երևանի քաղաքապետի մամուլի խոսնակ Հակոբ Կարապետյանը: Նա ասաց, որ քաղաքապետ Հայկ Մարությանը հայտարարել է, որ Սամվել Ալեքսանյանից կարող է նվիրատվություն ընդունել այնպես, ինչպես պատրաստ է ընդունել ցանկացած որևէ մեկից:

«Որպես «Ալեքս ընդ հոլդինգ» ընկերության հիմնադիր-սեփականատեր պետռեգիստրում գրանցված է մի անձի անունով, որի անունը Սամվել Ալեքսանյան չէ: Տնօրենը, որ ստորագրել է պայմանագիրը քաղաքապետարանի հետ, Հայկ Իսրայելյանն է: Քաղաքապետարանը չունի այդ խնդիրը պարզելու, թե արդյոք այս կամ կազմակերպության հետևում կանգնած է այս կամ այն գործարարը, կամ ոչ: Իսկ երբ հարցնում են՝ ստացե՞լ եք նվիրատվություն Սամվել Ալեքսանյանից, բնականաբար, պատասխանն է՝ ոչ, որովհետև եթե ասենք՝ ստացել ենք, պայմանագիր կնքած Իսրայելյանը կարող է զանգել ու ասել՝ «Եղբայր, մենք նվեր տանք, դու ուրիշ մարդու անուն հնչեցնե՞ս»: Եթե դուք կարծում եք, որ դա «Ալեքս հոլդինգն» է և կապ ունի Սամվել Ալեքսանյանի հետ, ես, առավելևս Հայկ Մարությանը չենք կարող անել հայտարարություններ ասեկոսեների, տարածված կարծիքների հիման վրա, առավելևս, որ պախարակելի բան Սամվել Ալեքսանյանից նվեր ընդունելու մեջ չկա»,- ասաց նա։

Մանրամասները՝ տեսանյութում:

Նարեկ Կիրակոսյան