19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Քաղաքապետարանը մերժել է Սուրբ Ծննդյան տոնավաճառը Հյուսիսային պողոտայում կազմակերպելու դիմումը
27.11.2019 | 19:29
«Սուրբ Ծննդյան տոնավաճառ» ֆեյսբուքյան էջը հայտարարություն է տարածել, որում նշվում է, որ Երևանի քաղաքապետարանը մերժել է՝ այս տարի նույնպես Հյուսիսային պողոտայում Սուրբ Ծննդյան տոնավաճառ կազմակերպելու մասինիրենց դիմումը։
Հայտարարության մեջ մասնավորապես նշված է․ «7 տարի շարունակ դեկտեմբեր ամսվա ընթացքում Սուրբ Ծննդյան տոնավաճառի շնորհիվ Հյուիսային պողոտան վերածվում էր նախատոնական լուսավոր անկյունի՝ ձմռան ցուրտ օրերին դառնալով հաճելի վայր մեր համաքաղաքացիների և զբոսաշրջիկների համար։ Այս տարի նույն վայրում նույն միջոցառումը կազմակերպելու մեր դիմումը, ցավոք, մերժվեց քաղաքապետարանի կողմից՝ հնարավորություն չընձեռելով մեզ նույն նախատոնական ուրախ մթնոլորտը պարգևել մեր քաղաքին։ Բացի այդ, տոնակատարությունների ժամանակահատվածը կրճատվել է 15 օրվա՝ նվազեցնելով զբոսաշրջիկների հնարավորությունը՝ այցելելու մեր քաղաք և վայելելու նախածննդյան ուրախ տրամադրությունը։ Մաղթում ենք, որ Երևանի քաղաքապետարանն իր միջոցներով կարողանա ավելի լավ միջոցառում կազմակերպել, որը հնարավորություն կտա մեր քաղաքացիներին՝ բարձր տրամադրությամբ պատրաստվել գալիք տոներին և հատկապես՝ Սուրբ Ծննդյան տոնին։ Մենք միշտ եղել ենք մեր պետության կողքին և այսուհետ նույնպես պատրաստ ենք աջակցել ցանկացած արդյունավետ և տրամաբանական գաղափարի։ Ի բարօրություն մեր երկրի, ոչ սևին և սպիտակին, այո՛ եռագույնին»։
Հիշեցնենք, որ ավելի վաղ` նոյեմբերի 14-ին Երևանի քաղաքապետարանը հայտարարություն էր տարածել այն մասին, որ այս տարի Սուրբ Ծննդյան տոնավաճառը գործելու է Երևանի 2800-ամյակի պուրակում, իսկ Հյուսիսային պողոտայում կազմակերպվելու է կրեատիվ տոնածառերի ցուցադրություն։
Նելլի Մելքոնյան
