Հրաժարվեցինք հանդիպումից և դուրս եկանք․ «Ռեստարտ»-ի անդամների և ոստիկանապետի հանդիպումը չի կայացել

Այսօր առավոտյան Ոստիկանության գլխավոր մասնաշենքի մոտ ակցիայի ընթացքում «Ռեստարտ» նախաձեռնության անդամները հանդիպում էին պահանջում ՀՀ ոստիկանապետի ժամանակավոր պաշտոնակատար Արման Սարգսյանի հետ։ Ավելի ուշ՝ ֆեյսբուքյան ուղիղ եթերով «Ռեստարտ»-ի անդամները հայտնեցին, որ հանդիպումը չի կայացել, քանի որ Ոստիկանությունում չեն համաձայնել ուղիղ եթերում քննարկում անցկացնել։

«Մենք մեր ակցիայի ընթացքում նշել էինք, որ եթե հանդիպումը տեղի ունենա, այն պետք է ուղիղ հեռարձակվի կամ որևէ կերպ լուսաբանվի։ Ոստիկանապետը մեզ հանդիպեց ու նշեց, որ Ոստիկանությունը, հանդիսանալով ուժային կառույց, չունի այնպիսի պրակտիկա, որ ուղիղ եթերում քաղաքացիների հետ հանդիպումներ ունենա։ Նշեցին, որ այդպիսի ձևաչափով նպատակահարմար չէ հանդիպում կազմակերպել։ Պնդումներ էին բերում, թե գուցե այնպիսի խոսակցություն գնա կամ այնպիսի տեղեկություններ հնչեն, որոնք հրապարակման ենթակա չեն»,- ասաց «Ռեստարտ»-ի անդամներից Յուրի Ավագյանը։

Նրա խոսքով՝ իրենց առաջարկել են, որ հանդիպումն ուղիղ եթերով չհեռարձակվի, այլ պարզապես տեսաձայնագրվի։ «Մեզ ասացին՝ Դուք միացրեք ուղիղ եթերը, ասեք հանրությանը ձեր հարցադրումները, որոնք ուզում եք ներկայացնել, ինչից հետո հեռարձակումը կդադարեցվի և մենք կշարունակենք քննարկումը։ Մեկ անգամ այդպես փորձեցինք, բայց, քննարկումը չսկսած, հասկացանք, որ սա մեր արշավի հռչակած սկզբունքներին չի համապատասխանում, ուստի հրաժարվեցինք հանդիպումից և դուրս եկանք», – ասաց Յուրի Ավագյանը։

Նելլի Մելքոնյան