18.10.2026 | 13:43
Օդի ջերմաստիճանը կնվազի
ԵՄ Խորհուրդը հաստատել է Եվրահանձնաժողովի նոր կազմն առանց Մեծ Բրիտանիայի թեկնածուի
Քաղաքականություն
25.11.2019 | 17:07
ԵՄ Խորհուրդը հաստատել է Եվրահանձնաժողովի (ԵՀ) նոր կազմը Ուրսուլա ֆոն դեր Լյաենի գլխավորությամբ, որը պետք է աշխատանքն սկսի դեկտեմբերի 1-ին։ Այս մասին ասվում է ԵՄ Խորհրդի՝ երկուշաբթի Բրյուսելում տարածված հայտարարությունում։ Մեծ Բրիտանիան, որը պետք է դուրս գա Եվրամիությունից 2020 թվականի հունվարի 31-ից, այդպես էլ Բրյուսելին չի ներկայացրել իր թեկնածուին։ ԵՀ նոր կազմը այժմ վերջնականապես պետք է հաստատի Եվրոպական խորհրդարանը, որը դրա համար կքվեարկի նոյեմբերի 27-ին Ստրասբուրգում, լիագումար նիստում, տեղեկացնում է ՏԱՍՍ-ը։
«Խորհուրդն այսօր հաստատել է անձանց ցուցակը, ովքեր առաջարկվել են Եվրահանձնաժողովի կազմում նշանակվելու համար մինչև 2024 թվականի հոկտեմբերի 31-ը։ Սա Եվրախորհրդարանում քվեարկության հնարավորություն է բացում ԵՀ լրիվ կազմի հաստատման համար»,- ասվում է փաստաթղթում։
Մեծ Բրիտանիան, որը, համաձայն Լիսաբոնի համաձայնագրի, պետք է ԵՄ-ից դուրս գար 2019 թվականի մարտին՝ Եվրախորհուրդ գրավոր հայտարարություն տալուց ուղիղ 24 ամիս հետո, չկարողացավ դա անել երկրի քաղաքական էլիտայի շրջանում սուր տարաձայնությունների պատճառով։ Մինչև այդ պահը, ձևականորեն Մեծ Բրիտանիան մնում է ԵՄ լիիրավ անդամ՝ բոլոր իրավունքներով ու պարտականություններով, ներառյալ սեփական եվրահանձնակատարի նշանակման պարտականությունը նոր Եվրահանձնաժողովի կազմում։ Բայց Լոնդոնը դա չի արել, և հիմա ԵՄ ինստիտուտները պատրաստում են իրավաբանական հիմնավորում, որը թույլ կտա Լոնդոնի համար ևս մեկ բացառություն անել ու խուսափել իրավաբանական ճգնաժամից նոր Եվրահանձնաժողովի նշանակման հետ կապված։
