«Բարձրագույն կրթության մասին օրենքը փոխելիս շտապում ենք, որովհետև շատ ենք ուշացել»․ ԿԳՄՍՆ խորհրդական. ՏԵՍԱՆՅՈՒԹ

Չենք ուշացել, պարզապես որոշել ենք ևս 10-11 օրով երկարացնել «Բարձրագույն կրթության և գիտության մասին» ՀՀ օրենքի նախագծի հանրային քննարկումները։ Ամենայն հավանականությամբ, այսօր՝ օրվա ավարտին կամ վաղը նախագծի ներկայիս տարբերակը նախարարության կայքում կտեղադրվի և կդառնա հանրային սեփականություն։ Այս մասին այսօր՝ «Բարձրագույն կրթության և գիտության մասին» օրենքի նախագիծ․ ի՞նչն այն չէ, ինչո՞ւ է ուշանում» թեմայով քննարկման ընթացքում նշեց ՀՀ Կրթության, գիտության, մշայկույթի և սպորտի նախարարի խորհրդական Սամվել Կարաբեկյանը։

Ըստ նրա՝ հանրային քննարկումների փուլի ավարտից հետո, սահմանված կարգով, նախագիծը կտեղադրվի e-draft․am կայքում։

«Ընթացքի մեջ ենք։ Գուցե մի փոքր շտապում ենք, որովհետև շատ ենք ուշացել։ Կրթական համակարգի զարգացումն ամբողջ աշխարհում արագ տեմպերով փոփոխվել է, երբ մենք, ըստ էության, տեղում կանգնած դոփում էինք։ Ինչո՞ւ, որովհետև մենք հռչակել ենք ինչ-որ սկզբունքներ, որոնք բխում էին մեր պարտավորություններից Բոլոնիայի գործընթացում, որով կառուցվածքային վերափոխումներ ենք արել, բայց դրանք չենք լցրել բովանդակությամբ։ Եվ մինչ մենք կանգնած էինք, այդ բովանդակությունը նորից փոխվեց։ Այժմ մարտահրավեր ունենք՝ փորձել վերականգնել կամ կրճատել այդ հետ ընկնելը և տեսնել զարգացման հեռանկարը։ Սա բարդ խնդիր է, և ես հասկանում եմ, որ դրան ուղղված քայլերը, երևի թե, մեծ ջանքեր կպահանջեն»,- ասաց ԿԳՄՍՆ խորհրդականը։

Մանրամասները՝ տեսանյութում։

Նելլի Մելքոնյան