Բռնության ակտով ընդհատվեց ընտանեկան բռնությունը կանխարգելող օրենքի նախագծի քննարկումը. իրավապաշտպան

Ընդդեմ կանանց նկատմամբ բռնության կոալիցիայի ծրագրերի ղեկավար, իրավապաշպան Զառա Հովհաննիսյանի խոսքով՝ այսօր «Ընտանեկան բռնությունների կանխարգելման և ընտանեկան բռնությունների զոհերի պաշտպանության» մասին օրինագծի հանրային քննարկման ժամանակ գրանցված միջադեպը փաստում է՝ Հայաստանում բացակայում է հասարակությանը հուզող թեմաներով քննարկումներ կազմակերպելու մշակույթը:

«Մենք տեսնում ենք, որ այդ մշակույթի բացակայությունը հասարակության մեջ բերում է նմանատիպ երևույթների, որ հանրային քննարկում, որպես այդպիսին, տեղի չի ունենում: Տեղի է ունենում աղմուկ, պարտադրանք, սա նաև բռնություն է, քանի որ բռնության ակտով ընդհատվեց հանրային քննարկումը՝ օրինագծի վերաբերյալ»,- Factor.am-ի հետ զրույցում ասաց իրավապաշտպանը:

Ըստ տիկին Հովհաննիսյանի՝ օրինագծի ընդիմախոսները բարձրաձայնում էին իրենց մտահոգությունները, սակայն չէին լսում հակափաստարկներ: «Հակափաստարկներ չլսելը նշանակում է, որ եկել էին պարզապես խաթարելու և խափանելու քննարկումը»,- համոզմունք հայտնեց Զառա Հովհաննիսյանը:

Նշենք, որ այսօր «Ընտանեկան բռնությունների կանխարգելման և ընտանեկան բռնությունների զոհերի պաշտպանության» մասին օրինագծի հանրային քննարկումը մի քանի անգամ ընդհատվեց: Նախագծի ընդդիմախոսները` Խաչիկ Ստամբոլցյանը, «Հանուն ինքնիշխանության վերականգնման» նախաձեռնության համակարգող Հայկ Նահապետյանը և մի խումբ այլ անձինք վիրավորական արտահայտություններ հնչեցնելով օրինագծի հեղինակների հասցեին` խաթարում էին քննարկման ընթացքը:

Ի վերջո` արդարադատության նախարարը քննարկման կեսից հեռացավ, ինչից հետո քննարկումը նախատեսվածից շուրջ ավարտվեց:

Մանրամասները՝ տեսանյութում:

Շողիկ Գալստյան