23.11.2024 | 20:00
Չի ներկայացվել գույքի և ունեցվածքի 509 հայտարարագիր՝ 4 տարում․ ի՞նչ է սպասվում օրինախախտներին. ՔՆՆԱՐԿՈՒՄ
Գյումրիի գիշերօթիկի բակում տոպրակի մեջ հայտնաբերված երկվորյակները կրկին մանկատանն են. մայրը երեխաներին անուշադրության է մատնել
Հասարակություն
12.11.2019 | 16:33
Մեկ տարի առաջ Գյումրիի Ֆիրտյոֆ Նանսենի անվան երեխաների խնամքի ու պաշտպանության կենտրոնի բակում պոլիէթիլենային տոպրակի մեջ հայտնաբերված երկվորյակները կրկին հայտնվել են մանկատանը: Factor.am-ի հետ զրույցում այս մասին հայտնեց Աշխատանքի ու սոցիալական հարցերի նախարարի մամուլի խոսնակ Սոնա Մարտիրոսյանը։
Մինչ այդ, նշենք, երկվորյակները վերադարձել էին կենսաբանական ընտանիք ու մի քանի ամիս է՝ մոր հետ բնակվում էին Երևանում վարձակալած բնակարանում։
«Երեխաներին 2 ու կես ամիս առաջ իրենց մայրը պահանջել էր վերադարձնել ընտանիք։ Այդ պրոցեսը երկար տևեց, որովհետև սոցիալական աշխատողները, մեր մասնագետները փորձում էին հասկանալ՝ արդյո՞ք ընտանիքն ունի բավարար պայմաններ, խոսքը ոչ միայն սոցիալ-տնտեսական, այլև բարոյահոգեբանական պայմանների մասին է, արդյո՞ք այդ պայմանները բավարար են երեխաների վերադարձի համար: Համայնքային խորհուրդը եզրակացություն էր տվել, որ երեխաները կարող են վերադառնալ ընտանիք, և նրանք վերադարձան։ Բայց ընտանիքում մնացին շատ քիչ՝ շուրջ մեկ ամիս»,- ասաց Սոնա Մարտիրոսյանը։
Ընտանիք երեխաների վերադարձից հետո հարևանների կողմից զանգեր են ստացվել, որ երկվորյակներն անուշադրության են մատված, մայրը բավարար չափով հոգ չի տանում փոքրիկների մասին։
«Մոտ մեկ ամիս հետո մենք սկսեցին հարևանններից ահազանգել ստանալ, որ երեխաները մատնված են անուշադրության, նրանց նկատմամբ անգամ բռնություն է գործադրվում։ Առաջին ահազանգերից հետո համայնքային սոցիալական աշխատողներն ու մեր մասնագետները գնացել էին ընտանիքին այցի և տեղում հասկացել, որ երեխաների հետագա կեցությունը կենսաբանական ընտանիքում չի բխում նրանց շահերից, և երեխաների համար լավագույն տարբերակը կլինի հաստատություն վերադառնալը»,- ասաց նախարարի մամուլի խոսնակը։
Երեխաներն այժմ առողջ են ու շատ լավ վիճակում։ Նրանք չեն տեղափոխվի Գյումրիի «Երեխաների տուն», որտեղ գտնվում էին ընտանիք վերադառնալուց առաջ, կմնան Երևանի մանկան տանը։
Սոնա Մարտիրոսյանը նաև նշեց, որ երկվորյակների մայրն առանձնապես չի խոչընդոտել, որ երեխաներին վերցնեն իրենից։
«Կարծում էինք, որ մայրը կընդդիմանա, բայց ընդդիմանալու նշույլներ էլ չեղան։ Մենք չենք խնդրել երեխաներին հետ վերցնել, դա իր կամքն էր: Ինքը շատ գնաց-եկավ՝ երեխաներին վերցնելու համար։ Այնուամենայնիվ, երբ գնացել էին երեխաներին հաստատություն վերադարձնելու, ինքն առանձնապես դեմ չէր եղել»,- ասաց Մարտիրոսյանը։
Հիշեցնենք, որ 2018թ. հոկտեմբերի 17-ին մայրը նորածին երկվորյակներին՝ Վահանին ու Վահեին պոլիէթիլենային տոպրակով թողել էր Գյումրու գիշերօթիկի բակում և հեռացել։ Երեխաներին գտել էր հաստատության պահակը։ Նա նկատել էր, որ տոպրակը շարժվում է, բացել էր ու տեսել, որ դրա մեջ նորածին երեխաներ են։
Մի քանի օր անց՝ հոկտեմբերի 19-ին, Ոստիկանությունը գտել էր երեխաների մորը՝ 18-ամյա Մարիամ Մկրտչյանին, որն Արարատի մարզի Մասիս քաղաքից է: Նա հրաժարվել էր երեխաներից: Հանրապետությունում փոքրիկների պատմությունը մեծ աղմուկ էր բարձրացրել։ Հայտնվել էին երկվորյակներին որդեգրել ցանկացող բազմաթիվ ընտանիքներ ոչ միայն Հայաստանից, այլև արտերկրից։ Որդեգրում, սակայն, այդպես էլ չեղավ։
Աշխատանքի և սոցիալական հարցերի՝ այն ժամանակվա նախարար Մանե Թանդիլյանը հայտարարել էր, որ ավելի ճիշտ և նպատահարմար կլինի, որ երեխաներն ապրեն մոր հետ։ Մանե Թանդիլյանը հանդիպել էր փոքրիկների մորը, որը ցանկությունէր հայտնել վերադարձնել փոքրիկներին: Նախկին նախարարն էլ իր հերթին խոստացել էր օգնել մորը սոցիալական վիճակի բարելավման հարցում:
