20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Պողոս Պողոսյանի եղբորորդին կեղծ է որակում ռեկտոր նշանակվելու խոստման մասին տեղեկությունը
06.11.2019 | 20:41
Ռոբերտ Քոչարյանի թիկնազորի կողմից դաժանաբար սպանված Պողոս Պողոսյանի եղբորորդին կեղծ և իրականության հետ աղերս չունեցող է համարում մամուլում տարածված այն տեղեկությունը, թե իշխանությունն իրեն բարձր պաշտոն է տալու:
Նշենք, որ լրատվամիջոցներից մեկը գրել էր, թե Պողոս Պողոսյանի եղբոր որդուն` Սամվել Պողոսյանին, իշխանական որոշ շրջանակներ խոստացել են նշանակել Խաչատուր Աբովյանի անվան հայկական պետական մանկավարժական համալսարանի ռեկտոր:
«Ըստ մեզ հասած տեղեկությունների, իշխանական որոշ շրջանակներ Սամվել Պողոսյանին խոստացել են Պողոս Պողոսյանի սպանության գործը «հորով-մորով» անելուց հետո նշանակել ՀՊՄՀ-ի ռեկտոր»,- նշել է լրատվամիջոցը։
Արձագանքելով հրապարակմանը՝ Պողոս Պողոսյանի եղբորորդի Սամվել Պողոսյանը մեզ փոխանցեց. «Հասարակության մեջ կեղծ լուրեր տարածելը եղել և մնում է նախորդ հանցագործ ռեժիմի ձեռագիրը։ Ամոթ է անընդհատ սուտ գրելը, խեղկատակություն անելը, ատելություն տարածելը։ Սեփական ազգի ու պետության դեմ գործողնե՛ր, պատմությունը և սերունդները ձեզ չեն ներելու»:
Սամվել Պողոսյանը հերքում է նաև լրատվամիջոցի պնդումը, թե ինքը լրագրողների զանգերին չի պատասխանել և նշված տեղեկության մասին մեկնաբանություն չի տվել: «Ինձ մոտ երբևէ անպատասխան զանգ չի լինում»,- նշեց նա:
Հիշեցնենք, որ այն բանից հետո, երբ Պողոս Պողոսյանի սպանության ականատես Սթիվեն Նյուտոնը դիմում ներկայացրեց Գլխավոր դատախազություն՝ պատմելով իր տեսածը, դրա հիման վրա վարույթ հարուցվեց ու գործն ուղարկվեց Քննչական կոմիտե։ Ըստ էության, Նյուտոնի ներկայացրած փաստաթղթերն առերևույթ վկայում են, որ Պողոս Պողոսյանը կյանքից զրկվել է ոչ թե անզգուշությամբ, այլ Աղամալ Հարությունյանի և գործով չպարզված այլ անձանց կողմից՝ դիտավորությամբ և խուլիգանական դրդումներով:
Պողոս Պողոսյանի սպանության վերաբերյալ գործով շուրջ 10 անձ է հարցաքննվել:
Ռոբերտ Անանյան
