03.10.2026 | 22:08
Հայաստանի հավաքականը ժամանել է Պոդգորիցա
«Հայաստանում այսօր 10-15 հազար կույր կա, սակայն պաշտոնական թիվը կրկնակի քիչ է»․ Յուրի Ավետիսյան. ՏԵՍԱՆՅՈՒԹ
Հասարակություն
06.11.2019 | 12:24
Պաշտոնապես հայտարարում են, որ այսօր Հայաստանում 5-6000 կույր կա, սակայն այդ թիվը կրկնակի քիչ է։ Այսօր Հայաստանում 10-15 հազար չտեսնող մարդ կա, շատերը չեն գրանցվում, չեն ներկայանում։ Այս մասին այսօր հրավիրված ասուլիսի ընթացքում նշեց Սոկրատ Շահնազարյանի անվան Կույրերի միավորման մշակույթի տան տնօրեն Յուրի Ավետիսյանը։
Ըստ նրա՝ իրենց առաջնային խնդիրը կապված է տեղաշարժի հետ․ «Գոնե պետք է ձեռնարկություն լինի, մշակութային օջախ, որտեղ տվյալ մարդը կկարողանա գոնե իր հոգևոր գործունեությունը ծավալել ու զարգանալ։ Տարիներ առաջ, մեր մշակույթի տան յուրաքանչյուր անդամ, որն ուներ առաջին և երկրորդ կարգի հաշմանդամություն, օգտվում էր տրանսպորտից։ Այսօր, իհարկե, նրանց համար կա անվճար երթևեկելու հնարավորություն, սակայն դա խնդրի կարգավորման ընդամենը 5%-ն է։ Սոցիալական ծանր կացությունից ելնելով, նախկինում մշակույթի կառույցներին մոտ գտնվող իրենց բնակարանները վաճառելով, նրանք տեղափոխվել են քաղաքի ծայրամասեր և այժմ գրեթե անհնար է դարձել նրանց մասնակցությունը մշակույթի տան բոլոր աշխատանքներին»։
Յուրի Ավետիսյանի խոսքով՝ Կույրերի միավորման մշակույթի տանն այս պահին 30-ից ավելի խմբակ կա, սակայն չկա շահառու։ «Մարդիկ չեն հաճախում։ Դիմում ենք պատկան մարմիններին՝ վերականգնելու նրանցից վերցված՝ տեղաշարժվելու սահմանադրական իրավունքը։ Այսօր սոցիալական կացությունն այնքան ծանր է, որ առնվազն 400 դրամ է անհրաժեշտ, որ կույր մարդն իր ուղեկցողի հետ մշակույթի տուն այցելի»,- ասաց մշակույթի տան տնօրենը։
Յուրի Ավետիսյանը նշեց, որ իրենց հուզող մյուս կարևոր խնդիրը վերաբերում է ինչպես շենքի ներսում, այնպես էլ դրան հարակից տարածքում գտնվող մարզասարքերին․ «Ունենք հրաշալի մարզասրահներ, բայց չունենք գույք։ Առայժմ կարող է լինել այգիներում դրվող մարզական գույք, որոնցով գիտական աշխատանքից, երկարատև նստակյաց վիճակից հետո մշակույթի տան անդամները կկարողանան մարզվել, հակառակ դպքում՝ ձեռք կբերեն երկրորդ-երրորդ կարգի հաշմանդամություն»։
Մանրամասները՝ տեսանյութում։
Նելլի Մելքոնյան
