27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
ԱԻՆ-ում աշխատող բարեկամ չունեմ. Ֆելիքս Ցոլակյան. ՏԵՍԱՆՅՈՒԹ
Հասարակություն
04.11.2019 | 11:30
ԱԻ նախարար Ֆելիքս Ցոլակյանի խոսքով՝ ինքն անձամբ է խնդրել ՀՀ վարչապետին, որպեսզի Պետական վերահսկողական ծառայությունն ուսումնասիրություններ կատարի ԱԻՆ-ում:
«Աշխատանքից մարդկանց ենք ազատել կամ մարդու, որը բողոքել է, թե իբրև ԱԻՆ-ում տարբեր ուղղություններով խախտումներ կան, այդ պատճառով էլ խնդրել եմ, որպեսզի ուսումնասիրություններ կատարեն: Խոսքը Փրկարար ծառայության տնօրենի մասին է»,- այս մասին ԱԺ-ում լրագրողների հետ զրույցում ասաց նախարարը:
Ինչ վերաբերում է խոսակցություններին, որ ԱԻՆ-ում դժգոհությունների պատճառ է դարձել, որ ինքն իր յուրայիներին է աշխատանքի ընդունում, Ֆելիքս Ցոլակյանն ասաց, որ արդեն ասել է՝ այդ կառույցում բարեկամ աշխատող չունի և որևէ մեկին աշխատանքի չի ընդունել: Փոխարենն աշխատանքի է ընդունել ծանոթների, որոնց ճանաչել է, և որոնք ԱԻՆ-ում լուրջ փոփոխություններ են կատարել:
«Ասում էին, որ փոխնախարարը քրոջս տղան է, բայց հետո պարզեցին, որ քրոջս տղան չէ: Աշխատանքից ազատվել է ինը հոգի, որոնք ստորագրել են այն փաստաթղթի տակ, 6500 հոգանոց կոլեկտիվում այդքան են ստորագրել, որ իբրև կան խախտումներ: Կարծում եմ՝ նրանց մոտ ինքնապաշտպանական բնազդն է խոսել, քանի որ այդ ստորագրողները գիտեին, որ կառուցվածքային փոփոխություններ են լինելու, և նրանք կամ պետք է դուրս գային, կամ նրանց հետ մի բան պետք է լիներ, և նրանք նախապես նման բան են արել»,- շեշտեց Ֆելիքս Ցոլակյանը:
Նա նաև տեղեկացրեց, որ այդ մարդիկ արդյունավետ չեն աշխատել, աշխատանքի մեջ թերացել է նաև Փրկարար ծառայության պետը:
«Ամառային հրդեհների ժամանակ Փրկարար ծառայության ղեկավարը տեղում չի եղել, սա է հիմնական պատճառներից մեկը, նա արձակուրդում է եղել»,- շեշտեց նախարարը:
Մանրամասները՝ տեսանյութում:
Նարեկ Կիրակոսյան
