«Մինչև հիմա վարկ են վերցրել ու տվել են թոշակառուներին, դուք դրանից լա՞վ եք զգում». Սամվել Նիկոյանը՝ թոշակներն ու աշխատավարձերը չբարձրացնելու մասին

ՀՀԿ-ական պատգամավոր, ԱԺ ֆինանսավարկային և բյուջետային հանձնաժողովի անդամ Սամվել Նիկոյանը Factor.am-ի հետ զրույցում ասում է, որ ճիշտ է համարում եկող տարի թոշակներն ու աշխատավարձերը չբարձրացնելու առթիվ կառավարության որոշումը:

«Անթույլատրելի է, երբ պետությունը վարկ է վերցնում և այդ վարկով սպասարկում է սոցիալական ոլորտը»,- ասաց պատգամավորը՝ հավելելով. «Մինչև հիմա բալանսը խախտվել է հօգուտ սոցիալական ոլորտի»:

Ըստ Նիկոյանի՝ թող տնտեսական աճ լինի, հետո կլուծենք սոցիալական խնդիրները:

Հիշեցնենք, որ ընդամենն ամիսներ առաջ, նախընտրական շրջանում «Արմենիա» հեռուստաընկերության «Ռ-Էվոլյուցիա» հաղորդման ընթացքում վարչապետ, ՀՀԿ առաջին փոխնախագահ Կարեն Կարապետյանը անդրադառնալով 6-7 տոկոս տնտեսական աճին, հայտարարեց, թե եթե տնտեսական աճը այսօրվա տեմպերով շարունակվի, ապա առնվազն 2018 թվականին կենսաթոշակները, նվազագույն աշխատավարձը կբարձրանան:

Բյուջե 2018-ում կառավարությունը խոստանում է 4.5 տոկոս տնտեսական աճ, այս տարվա 3.2 տոկոսի դիմաց: Հարցին, թե այն, որ եկող տարվա բյուջեում, չնայած կանխատեսվող տնտեսական աճին, թոշակների ու նվազագույն աշխատավարձի բարձրացում չկա, նշանակո՞ւմ է, որ կառավարությունն ինքը չի հավատում իր խոստացած 4.5 տոկոս տնտեսական աճին, կամ էլ ՀՀԿ-ն ի դեմս վարչապետի մոլորեցրե՞ց ընտրողներին, ՀՀԿ ներկայացուցիչը բացասական պատասխան տվեց. «Այս տարի բոլոր նախադրյալները կան, որ մենք կարող ենք 4.5 տոկոս տնեսական աճ ամրագրել, և դա իրականություն դարձնել: Կառավարությունը շեշտադրումը դնում է կապիտալ ծախսերի ավելացման վրա: Գրեթե կրկնապատկում է կապիտալ ծախսերը, և դա շատ կարևոր է երկրի տնեսության զարգացման համար, որն իր հետ կարող է բերել հավելյալ մուտքեր, բյուջեի, տնտեսության աճ, ինչն էլ իր հետ կբերի սոցիալական ոլորտի ներդրումների աճ: Առաջնայինը տնտեսական աճ, հետո նոր սոցիալական»:

Դիտարկմանը, թե կառավարությունը խնայում է թոշակների ու խոցելի խավի հաշվին, Սամվել Նիկոյանն արձագանքեց. «Մինչև հիմա Ձեր ուզածով են արել, վարկ են վերցրել ու տվել են թոշակառուներին, և դուք դրանից լա՞վ եք զգում»:

Ավելին, ըստ Նիկոյանի, կառավարությունն այսօր պարզապետ «չի ընկնում պոպուլիզմի հետևից»: Հարցին, թե 290 մլն դրամ յուրացման մեջ մեղադրված Աշխատանքի և սոցիալական հարցերի նախարարության Սոցիալական ապահովության պետական ծառայության նախկին պետ Վազգեն Խաչիկյանի վաղաժամ ազատումը արդյոք չի՞ նշանակում, որ իրական բարեփոխումների և կոռուպցիայի դեմ պայքարի մասին կառավարության հայտարարությունները ոչ յուրայիններին են վերաբերում, ՀՀԿ պատգամավորն ասաց. «Ճիշտ չէ ձեր մոտեցումը: Վազգեն Խաչիկյանի ամենամեծ թերությունն այն էր, որ ինքն այդ բարձրաստիճան պաշտոնը չկարողացավ ամբողջությամբ տիրապետել և իրականացնել, ավելի շատ վատ կառավարման արդյունք էր էդ ամեն ինչը: Եվ ներողամտությունը նորմալ բան է, որը վերաբերում է ոչ ծանրագույն մեղքերին: Եթե մարդը ներողություն է խնդրում և դիմում է գրում, որ ինքն ուղղվել է, կարծում եմ` այդ ներողամտությունը բոլորին պետք է»:

Մանրամասները դիտեք Սամվել Նիկոյանի հետ Factor.am-ի հարցազրույցում:

Մարինե Խառատյան