«Նիկոլ Փաշինյանը մեծ հաշվով ասաց, որ պատրաստ չէ այլ քաղաքական միավորի միանալ». Ենիգոմշյանը՝ Ժիրայր Սեֆիլյանի կոչով հրավիրված հավաքի մասին

Հիմնադիր խորհրդարանի անդամ Ալեք Ենիգոմշյանը Factor.am-ի հետ զրույցում «կառուցողական» անվանեց Ժիրայր Սեֆիլյանի կոչով Ազգային դիմադրության ճակատ ստեղծելու առթիվ անցյալ շաբաթ օրը կայացած հավաքը, որին Սեֆիլյանի նշած 31 հոգանոց ցուցակից մասնակցել է 18 հոգի:

«Մի քանիսը հրապարակավ ասել են, որ չեն մասնակցի: Մեծամասնությունն անձամբ ասել է, որ համագործակցության առթիվ ոչ մի անձնական խնդիր չի տեսնում»,- ասաց Ենիգոմշյանը:

Հավաքին ներկա է եղել նաև Աժ «Ելք» խմբակցության ղեկավար Նիկոլ Փաշինյանը, ում անունը ևս ներառված էր Սեֆիլյանի ցուցակում:

«Նիկոլ Փաշինյանը մեծ հաշվով ասաց, որ ինքն ունի իր քաղաքական թիմը և պատրաստ չէ այլ քաղաքական միավորի միանալ»,-  ասաց ՀԽ անդամը՝ հավելելով. «Չնայած ինքը չի ասել, որ սա իմ առաջին ու վերջին հանդիպումն է ձեզ հետ, բայց ընդհանուր թիմ ստեղծելու գաղափարին ինքը կողմնակից չէ»:

Հավաքին ներկա չեն եղել նաև Սեֆիլյանի ցուցակում ներգրավված Վարդան Օսկանյանն ու Սեյրան Օհանյանը. վերջինը քաղաքում չի եղել, իսկ Վարդան Օսկանյանի հետ կապ հաստատել չի հաջողվել: Ենիգոմշյանը վստահեցրեց, որ «Ազգային դիմադրության ճակատը» միտված է ոչ թե «Սասնա ծռերի» մարած շարժումը կենդանացնելուն, այլ երկրի ահագնացող խնդիրները լուծելուն:

Ինչ վերաբերում է Հայաստանում ԵՄ պատվիրակության ղեկավար, դեսպան Պյոտր Սվիտալսկու հայտարարությանը, թե այսօր Հայաստանում քաղբանտարկյալներ չկան, Ենիգոմշյանը դա «անընդունելի ու ցավալի» մոտեցում անվանեց:

«Իհարկե ես իրավաբան չեմ, բայց ցանկացած մարդ որ ուսումնասիրի իրավունքի տեսանկյունից քաղբանտարկյալ հասկացությունը, պարոն Սվիտալսկու հայտարարության հետ հստակ հակասություններ կգտնի»,- նշեց ՀԽ անդամը:

Ըստ Ենիգոմշյանի՝ ո՛չ ԵՄ ներկայացուցիչը, ո՛չ էլ որևէ մեկը չի կարող իր բանավոր մերժումով ծածկել «Սասնա ծռերի» հանդեպ իրականացված անարդարությունները:

Մանրամասները դիտեք Factor.am-ի հետ Ալեք Ենիգոմշյանի հարցազրույցում:

Մարինե Խառատյան