«Մեր արվեստագետներին պետք է հասանելի դարձնենք. մեկնարկում է ԿԳՄՍՆ-ի «Օկտավա» նախագիծը». Արա Խզմալյան. ՏԵՍԱՆՅՈՒԹ

ԿԳՄՍՆ նախաձեռնությամբ Աղվերանում կայացած «Արժեք և գին» երկօրյա աշխատաժողովի ընթացքում ժամանակակից արվեստի բոլոր ՊՈԱԿ-ների տնօրենները, գեղարվեստական ղեկավարները, հաշվապահներն ու հանրային կապերի պատասխանատուները հնարավորություն ունեցան քննարկել ոլորտի առջև ծառացած խնդիրները։ Մենք կազմեցինք մի հարցաշար, որի միջոցով կարողացանք «քամել»  խնդիրները․ չենք կարող բարեկարգում իրականացնել՝ առանց դրանց ձևակերպման, հակառակ դեպքում՝ կձախողենք։

Այս մասին այսօր հրավիրված ասուլիսի ընթացքում նշեց ՀՀ կրթության, գիտության, մշակույթի և սպորտի նախարարի տեղակալ Արա Խզմալյանը։

«Պետք է հասկանանք՝ խնդիրների որ մասն է տվյալ կազմակերպության կառուցվածքային խնդիրը, իսկ որ մասը կարելի է լուծել օրենսդրական կարգավորումներով կամ կառավարության որոշումներով։ Այսուհետ ոլորտին վերաբերող ոչ մի որոշում չի ընդունվելու՝ առանց ոլորտի պատասխանատուների ընդգրկվածության։ ԿԳՄՍՆ-ն որդեգրել է ներառականության սկզբունքը և հարցերի համատեղ կարգավորման մեթոդը»,- ասաց փոխնախարարը։

Արա Խզմալյանը ներկայացրեց նաև ԿԳՄՍՆ նոր նախագծերից մեկը՝ «Լոգոս Լաբ» հարթակը․ «Եթե որևէ դրամատուրգ կամ սցենարիստ ուզում է նոր գործ ստեղծել, այստեղ այն դերասանների, հոգեբանների ու ռեժիսորների հետ քննարկելով, վերամշակելով, ընթերցումներ կազմակերպելով, նյութը փորձարկելով, կունենանք մի գործ, որը կկարողանանք որպես արդյունք մեր ռեժիսորներին ու կինոռեժիսորներին տրամադրել»։

Փոխնախարարը նաև երկու նոր նախաձեռնության մասին խոսեց։ Դրանցից մեկը Վանաձորում մեկնարկած «Օկտավա» նախագիծն է։

«Հյուրախաղերն ամենաանարդյունավետ ճանապարհն են միասնական մշակութային դաշտ ձևավորելու համար։ Մեր արվեստագետներին պետք է էկրանային կերպարներից դուրս հասանելի դարձնենք։ Դրա համար նախաձեռնել ենք մի ձևաչափ, որը քաղաքի բնակիչներին հնարավորություն կտա դեմ առ դեմ շփվել արվեստագետների հետ։ Արդեն այս շաբաթ՝ հոկտեմբերի 26-ին, 8 արվեստագետից ու մտավորականից կազմված խումբ կմեկնի Վանաձոր»,- եզրափակեց Խզմալյանը։

Մանրամասները՝ տեսանյութում։

Նելլի Մելքոնյան