Ադրբեջանում ընդդիմությունը  պատրաստվում է նոր մեծ հանրահավաքի. ոստիկանությունը սկսել է ձերբակալել ընդդիմադիր ակտիվիստներին

Հոկտեմբերի 19-ին Ադրբեջանի ընդդիմադիր ուժերը, «Դեմոկրատական ուժերի ազգային խորհրդի» գլխավորությամբ, պատրաստվում են մեծ հանրահավաք անցկացնել Բաքվում։ Քաղաքապետարանը, սակայն, չի արտոնել հավաքը և առաջարկել է այն կրկին անցկացնել Բաքվից դուրս՝ Լոկբատան ավանում։

Ադրբեջանական լրատվամիջոցների տեղեկացմամբ, սակայն, ընդդիմադիր ուժերը վճռական են տրամադրված և, չնայած արգելքին, որոշել են հավաքն անցկացնել հենց Բաքվում։

«Քաղաքապետարանը հերթական անգամ խախտել է հավաքների ազատության սահմանադրական իրավունքը և պահանջում է ակցիան անցկացնել Լոկբատանում։ Բայց մենք արդեն հայտարարել ենք, որ դա մեզ ձեռնտու չէ, և խաղաղ հանրահավաքը կկայանա հոկտեմբերի 19-ին ժամը 15։00-ին մետրոյի «Մայիսի 28» կայարանի մերձակա հրապարակում»,- ասվում է «Դեմոկրատական ուժերի ազգային խորհրդի» հայտարարության մեջ։

Նշենք, որ ավելի վաղ Բաքվի ոստիկանության մամուլի քարտուղար Էլշադ Հաջիևը հավաքի կազմակերպիչներին զգուշացրել էր, որ ցանկացած չարտոնված ակցիա  անմիջապես կկասեցվի:

Արդեն տեղեկություններ կան, որ ոստիկանությունը սկսել է ձերբակալել «Ադրբեջանի ազգային ճակատ» ընդդիմադիր կուսակցության  ակտիվիստներին՝ հանրահավաքի անցկացումը խափանելու համար։ Հաղորդվում է, որ վերջին օրերին 11 ակտիվիստ է ձերբակալվել:

Հիշեցնենք, որ սեպտեմբերի 28-ի հանրահավաքի անցկացման համար Բաքվի քաղաքապետարանը կրկին առաջարկել էր Լոկբատան ավանը: Ընդդիմադիր ուժերը, սակայն, մերժել էին առաջարկը՝ վայրը համարելով ոչ նպատահարմար, քանի որ այն Բաքվից դուրս է գտնվում: Հետագայում՝ հոկտեմբերի 8-ին արտոնվել էր քաղաքապետարանի մոտ գտնվող շենքերից մեկի բակում փոքրիկ ցույց անցկացնել, սակայն ոստիկանական ուժերը ցրել էին այն՝ ծեծելով մասնակիցներին և բերման ենթարկելով 30 ակտիվիստի: Ի դեպ՝ այն ակցիայի ընթացքում սահմափակվել է նաև լրագրողների աշխատանքը, տարածքում անջատվել է ինտերնետ կապը։

Նշենք, որ 2013 թվականին ստեղծված «Դեմոկրատական ուժերի ազգային խորհրդի» կազմում ներառված են «Ազգային ճակատ» կուսակցությունը, մի շարք հասարակական ու ոչ կառավարական կազմակերպությունների անդամներ, մտավորականության ներկայացուցիչներ:

Էմմա Չոբանյան