«Թումոն» կվերակառուցի Գյումրիի կենտրոնական շուկան. այստեղ նաև  խոհարարության ու հյուրընկալության դպրոց կգործի

Գյումրիի կենտրոնական շուկան շուտով «Թումո» ստեղծարար տեխնոլոգիաների կենտրոնի կողմից կվերակառուցվի ու կվերագործարկվի: Շինաշխատանքների մեկնարկի հստակ ժամկետներ, սակայն, առայժմ չկան, քանի որ ծրագիրը դեռևս նախնական փուլում է: Բայց արդեն իսկ հայտնի է, որ այն յուրահատուկ, նմանը չունեցող տարածաշրջանային ծրագիր է լինելու:

«Տարածքի ներուժը լիովին օգտագործելուն ուղղված այս նախաձեռնությունը կխթանի շահույթ չհետապնդող ծրագրերի իրականացմանը: Բացի այդ՝ տարածաշրջանի մասշտաբով կարևորություն ունեցող այս նախաձեռնությունը կայուն աշխատանքային միջավայր կապահովի փողոցային առևտրով զբաղվող անձանց համար, ինչպես նաև խթան կհանդիսանա թե՛քաղաքի ներքին, թե՛ զբոսաշրջային զարգացման համար»,- Factor.am-ին փոխանցեցին «Թումո» կենտրոնի մամուլի բաժնից։

Նշենք, որ Գյումրու կենտրոնական շուկայում առևտուրն իրականացվում է բացօթյա, երբեմն նաև հակահիգիենիկ պայմաններում: Այս ծրագրով նախատեսվում է ոչ միայն առևտրի իրականացման համար բարենպաստ պայմաններ ստեղծել, այլև խոհարարության դպրոց  ու ռեստորան կառուցել՝ ստեղծելով յուրահատուկ համալիր։

«Բացի հարմարավետ շուկայից՝ տարածքում կգործի նաև միջազգային մակարդակի խոհարարության և հյուրընկալման դպրոց: Դպրոցը խոհարարական դասընթացներ է անցկացնելու նաև զբոսաշրջիկների և այցելուների համար: Տարածքն ունենալու է իր ռեստորանը, լինելու է շուկայի առանձնացված հատված, որտեղ ներկայացված են լինելու միայն օրգանական մթերքներ: Լինելու է խանութ, որտեղ վաճառվելու են փաթեթավորված մթերքներ: Լինելու է նաև հատուկ թիմ, որը հետևելու է շուկայի և դպրոցի տարածքում սանիտարական կանոնների պահպանմանը»,- նշեց կենտրոնից:

Այստեղ համոզված են, որ ծրագիրը ոչ միայն կխթանի մի շարք ոլորտների ակտիվացմանը, այլև շահույթին ուղղված ծառայություններ մատուցելով՝ կդառնա լիարժեք ինքնաֆինանսավորվող:

«Այսպիսով, լինելով խոհարարական ավանդույթներ և քաղաքային մշակույթ ստեղծող ծրագիր, այն հանդիասանալու է քաղաքային կյանքի ակտիվացման կատալիզատոր՝ ստեղծելով նաև աշխատատեղեր, գրավելով զբոսաշրջիկներին և պահպանելով հանրային տարածքն ու վերադարձնելով այդ տարածքին իր հին նշանակությունը»,- նշեցին «Թումո»-ի հաղորդակցման բաժնից:

Հավելենք, որ սա «Թումո» ստեղծարար տեխնոլոգիաների կենտրոնի՝ Գյումրիում իրականացվելիք առաջին ծրագիրը չէ։ Կենտրոնը վերակառուցում է  նաև «Կումայրի» պատմամշակութային արգելոցում ընդգրկված Գյումրիի առաջին թատրոնի շենքը, որն անմխիթար ու վթարային վիճակում էր։ Շինաշխատանքների ավարտից հետո «Թումո»-ի Գյումրու մասնաճյուղը Տեխնոլոգիական կենտրոնից կտեղափոխվի այստեղ:

Էմմա Չոբանյան