Հրայր Թովմասյանի պաշտոնանկության վերաբերյալ նոր նախագիծ եմ դրել շրջանառության մեջ. Արման Բաբաջանյան. ՏԵՍԱՆՅՈՒԹ

«Իմ քայլը» խմբակցության կողմից ներկայացված՝ ՍԴ նախագահ Հրայր Թովմասյանի լիազորությունները դադարեցնելու հարցով Սահմանադրական դատարան դիմելու ԱԺ որոշման նախագծին անդրադառնալով պատգամավոր Արման Բաբաջանյանը հայտարարեց, որ հիասթափված է իշխանության ներկայացրած նախագծով:

«Շաբաթներ առաջ նմանօրինակ մի կապակցություն իր հրաժեշտի տեքստում ասում էր նախկին պաշտոնյաներից մեկը՝ «կանգ առ»-ի ու «ստոպ»-ի այս նմանությունները կարող են և կապ ունենալ իրար հետ: Տիկի՛ն Մակունց, հիասթափված եմ: Ձեր խմբակցության ներկայացրած հիմքը չափազանց թույլ է Հրայր Թովմասյանի լիազորությունները դադարեցնելու համար, այս դիմումը չի լուծելու ՍԴ խնդիրը, նույնիսկ դատարանի լիազորություններին տիրացած Հրայր Թովմասյանի հարցը»,- նշեց նա:

Արման Բաբաջանյանի խոսքով՝ առաջ քաշված նախաձեռնությունն ավելի շուտ ճգնաժամի խորացում է. «Մենք իրավունք չունենք գնալու այս զարտուղի ճանապարհով»:

Նա ներկայացրեց այն հանցագործությունը, որը լիովին բավարար է Հրայր Թովմասյանի, և ոչ միայն նրա, էջը փակելու համար. «Ես այսօր Հրայր Թովմասյանի պաշտոնանկության վերաբերյալ նոր նախագիծ եմ դրել շրջանառության մեջ: Հրայր Թովմասյանին ՍԴ նախագահ դարձնելու նպատակով կիրառվել է նախապես մշակված հանցավոր սցենար, որը ոչ այլ ինչ է, քան իշխանության բռնազավթման, ուզուրպացիայի օպերացիա: Սրան պետք է տրվի քրեաիրավական գնահատական, որի մասին ես այսօր հանցագործության մասին հաղորդում եմ ներկայացրել գլխավոր դատախազին»:

Արման Բաբաջանյանն ընդգծեց՝ ՍԴ-ի շուրջ ճգնաժամն իրականում համակարգային ճգնաժամ է, և այն կարող է հաղթահարվել բացառապես քաղաքական հայեցակարգային քայլերի միջոցով:

Մանրամասները՝ տեսանյութում:

Նարեկ Կիրակոսյան