23.11.2024 | 20:00
Չի ներկայացվել գույքի և ունեցվածքի 509 հայտարարագիր՝ 4 տարում․ ի՞նչ է սպասվում օրինախախտներին. ՔՆՆԱՐԿՈՒՄ
Միտումնավոր ապատեղեկատվություն է. նախագահականը՝ ԵՏՄ-ի միջոցառումներից Արմեն Սարգսյանին հեռու պահելու՝ Փաշինյանի հրահանգի մասին
Քաղաքականություն
03.10.2019 | 15:06
ՀՀ նախագահի աշխատակազմի հասարակայնության հետ կապերի վարչությունում միտումնավոր ապատեղեկատվություն և անտեղյակության արդյունք են համարում մամուլի հրապարակումներն այն մասին, թե վարչապետ Նիկոլ Փաշինյանը հանձնարարել է նախագահ Արմեն Սարգսյանին հեռու պահել ԵՏՄ Բարձրագույն խորհրդի երևանյան նիստի շրջանակում անցկացվող միջոցառումներից:
Ըստ մամուլի՝ դրա համար պատճառ է հանդիսացել այն, որ Նիկոլ Փաշինյանն Արմեն Սարգսյանին խնդրել է օդանավակայանում դիմավորել Հայաստան ժամանող Ռուսաստանի և Իրանի նախագահներին, սակայն նախագահը մերժել է:
Factor.am-ի հարցմանը՝ արդյո՞ք ՀՀ նախագահին վարչապետի կողմից նման առաջարկ եղել է, նախագահի աշխատակազմի հասարակայնության հետ կապերի վարչությունից պատասխանեցին. «Մամուլի այդ հրապարակումն իրականության հետ որևէ առնչություն չունի և միտումնավոր ապատեղեկատվության կամ անտեղյակության արդյունք է: ԵՏՄ բարձրագույն խորհրդի երևանյան նիստին Հանրապետության նախագահի մասնակցություն ի սկզբանե նախատեսված չի եղել: Դա պայմանավորված է արարողակարգային ձևաչափով. ԵՏՄ-ում Հայաստանը ներկայացնողը Հանրապետության վարչապետն է:
Նախագահ Սարգսյանը նախագահական նստավայրում հյուրընկալել է այդ օրերին աշխատանքային այցով Հայաստանում գտնվող Իրանի Իսլամական Հանրապետության նախագահ Հասան Ռոհանիին և պաշտոնական այցով ժամանած Սինգապուրի վարչապետ Լի Սյեն Լունին: Հանրապետության նախագահը մասնակցել է նաև ի պատիվ ԵՏՄ Բարձրագույն տնտեսական խորհրդի նիստի մասնակիցների տրված պաշտոնական ընթրիքին: Նախագահ Արմեն Սարգսյանն ու վարչապետ Նիկոլ Փաշինյանը ունեն հարգալից աշխատանքային հարաբերություններ»:
