11.06.2026 | 22:59
ԿԸՀ-ն անվավեր ճանաչեց 10/51 ընտրատեղամասի արդյունքները. ՔՊ-ն այնտեղ 630 քվե էր ստացել, «Ուժեղ Հայաստանը»` 222
«Վերջին 20 տարում առաջին անգամ ՀՀ ղեկավարն ինքնաթիռի տակ չդիմավորեց ՌԴ նախագահին՝ «կզած» չգնաց». Ստեփան Գրիգորյան. ՏԵՍԱՆՅՈՒԹ
Քաղաքականություն
01.10.2019 | 20:00
Factor.am-ի հարցազրույցը Գլոբալիզացիայի և տարածաշրջանային համագործակցության կենտրոնի ղեկավար, քաղաքագետ Ստեփան Գրիգորյանի հետ
– Պարո՛ն Գրիգորյան, Երևանում անցկացվեց Եվրասիական տնտեսական բարձրագույն խորհրդի նիստը: Մեծ թվով հյուրեր են ժամանել Հայաստան: Նման մասշտաբի միջոցառման անցկացումն ինչպե՞ս եք գնահատում:
– Ես այդ պրոցեսին ուզում եմ այլ տեսանկյունից նայել: Փաստը, որ 8 երկրների ղեկավարներ հավաքվեցին Հայաստանում, դրական և լուրջ բան է, հատկապես, երբ խոսում ենք Ռուսաստանի, Իրանի, Սինգապուրի, Ղազախստանի նման երկրների մասին: Երկրորդ՝ առաջին անգամ է, որ տարածաշրջանային երեք պետությունների՝ Հայաստանի, ՌԴ-ի և Իրանի ղեկավարները հավաքվեցին Երևանում: Ես դա բարձր եմ գնահատում և շնորհավորում եմ Նիկոլ Փաշինյանի կառավարությանը: Դա ջախջախում է նախկինների վայնասունը, թե Ռուսաստանի հետ փչացան հարաբերությունները, տարածաշրջանային ոչ մի բան չի արվում և այլն:
– Բացի նախկիններին ջախջախելուց՝ Հայաստանի տարածաշրջանային դերի բարձրացում սրանից ակնկալո՞ւմ եք: Ըստ Ձեզ՝ ի՞նչ պետք է արվի, որպեսզի Հայաստանը, ինչպես նշվում է, Իրանի և ԵՏՄ-ի միջև կապող օղակ դառնա:
– Նիկոլ Փաշինյանի և Հասան Ռոհանիի միջև երկկողմ հանդիպումն արդեն կայացել է, և քննարկվել է Ձեր կողմից բարձրացված հարցը: Քանի որ Իրանը ստորագրեց և արդեն ուժի մեջ կմտնի ԵՏՄ-ի հետ պայմանագիրը, դռները բացված են՝ Իրանն այսուհետ Հայաստանի հետ ավելի ակտիվ կարող է աշխատել: Բայց նաև քաղաքական շատ դրական բանի մասին եմ ուզում ասել: Գոնե վերջին 20 տարվա ընթացքում առաջին անգամ է, որ Հայաստանի ղեկավարն ինքնաթիռի տակ չի դիմավորում Ռուսաստանի նախագահին: Կա արարողակարգ, պետք է դա հարգել: «Կզած» չգնացին՝ դա հարգանք է Պուտինի նկատմամբ, այլ ոչ թե քծնանք: Պուտինն էլ դա կգնահատի: Նման մարդկանց ավելի շատ են գնահատում, քան քծնողներին: Նախկինները սովոր էին քծնելու և չէին պատկերացնում: Ասում էին՝ Պուտինը չի գա, բայց մարդը լավ էլ եկավ: Համոզված եմ, որ լուրջ քննարկումներ կլինեն, տարաձայնություններ էլ կլինեն՝ գազի գնի հետ կապված, երեկ փոխվարչապետը բարձրացրեց Վերին Լարսում բեռնատարների հերթերի հարցը: Հիշեք իմ խոսքերը, ավելի կհարգեն մեզ, կհասկանան, որ այստեղ կա իշխանություն: Իշխանություն, որը ոչ թե անձնական հարցեր է լուծում՝ արտոնություն տվեք, բարեկամիս պաշտոն տվեք, այլ պետություն է, որը լուծում է հասարակության շահերից բխող հարցերը:
– Կոնկրետ գազի գնի վերաբերյալ՝ պետությունն ինչպե՞ս է այդ հարցը լուծելու: Չնայած բանակցությունները դեռ չեն ավարտվել, բայց արդեն թանկացումների չափեր են նշվում:
– Դուք վերջին շրջանում լսե՞լ եք նման բան Վրաստանի և Ուկրաինայի կոնտեքստում, լսե՞լ եք, որ Վրաստանն ու Ուկրաինանն դժգոհ լինեն, որ գազի գինը բարձրացել է: Չեք լսել, որովհետև իրենք ուրիշ ճանապարհով գնացին: Ոչ թե համոզեցին Ռուսաստանին, որ գազի գինը չբարձրացնի, այլ այլընտրանք զարգացրեցին:
– Հայաստանի համար այլընտրանք կարող է լինել Իրանը: Բայց այս դեպքում նույնպես Ռուսաստանի կողմից ճնշումների չե՞նք ենթարկվի:
– Շատ հասարակ… Իմ խորհուրդն է մեր կառավարությանը՝ պետք է շտապ վերանայել «Գազպրոմ»-ի հետ պայմանագրի այն կետը, որով «Գազպրոմ»-ը մենաշնորհ ստացավ գազի մատակարարման հետ կապված: Այն գազը, որը Հայաստանը գնում է Իրանից, իրավունք չունի մատակարարել քաղաքացիներին կամ բիզնեսին: Այս կետը պետք է վերանայել, քանի որ «Գազպրոմ»-ը մի շարք հարցերում խախտել է պայմանագիրը: Եվ ես առաջարկում եմ կառավարությանը՝ շատ արագ վերանայել: Դրանից հետո Իրանից կսկսենք գազ գնել, որը կմատակարարվի բնակչությանը, և կտեսնեք՝ դրանից հետո ինչպես կփոխվի «Գազպրոմ»-ը, կիջեցնեն գները:
Հարցազրույցն ամբողջությամբ՝ տեսանյութում:
Թամարա Հակոբյան
