06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
«Լուսավոր Հայաստանն» Արման Բաբաջանյանին միջազգային խորհրդարանական խմբերում այլ պատգամավորներով է փոխարինում
Քաղաքականություն
30.09.2019 | 18:48
ՀՀ Ազգային ժողովի «Լուսավոր Հայաստան» խմբակցությունը պատգամավոր Արման Բաբաջանյանին բարեկամական խմբերում և միջազգային խորհրդարանական վեհաժողովներում փոխարինում է այլ պատգամավորներով:
Factor.am-ին պաշտոնական աղբյուրներից հայտնի դարձավ, որ Հայաստան-Իրան և Հայաստան-Սիրիա բարեկամական խմբերում Արման Բաբաջանյանին կփոխարինի «Լուսավոր Հայաստան» խմբակցությունից Սարիկ Մինասյանը, Հայաստան-Լատվիա, Լիտվա, Էստոնիա և Հայաստան-Լեհաստան բարեկամական խմբերում՝ Այվազյանը, Հայաստան-Կուբա և Հայաստան-Ֆրանսիա բարեկամական խմբերում՝ Արկադի Խաչատրյանը: Վերջինն Արման Բաբաջանյանին կփոխարինի նաև ԵՄ-Հայաստան խորհրդարանական գործընկերության կոմիտեում, Ֆրանկոֆոնիայի խորհրդարանական վեհաժողովում, ՀՀ Ազգային ժողովի և Արցախի Ազգային ժողովի միջև համագործակցության միջխորհրդարանական հանձնաժողովում:
Նկատենք, որ բարեկամական խմբերի և միջազգային խորհրդարանական վեհաժողովների առումով ԼՀԿ-ի այլ պատգամավորների դեպքում ևս փոփոխություն եղել է, բայց նրանք, ամեն դեպքում, այլ խմբերում են ընդգրկվել, իսկ Արման Բաբաջանյանն ընդհանրապես դուրս է մնացել:
Հիշեցնենք, որ Արման Բաբաջանյանը վերջերս հայտարարեց, որ դուրս է գալիս «Լուսավոր Հայաստան» խմբակցությունից և գործելու է որպես ազատ պատգամավոր:
Նարեկ Կիրակոսյան
