Բողոքի ակցիա Արարատի մարզում. մասնակիցները Գարիկ Սարգսյանից պահանջում են չեղարկել իր կայացրած որոշումը

Սեպտեմբերի 30-ը Արարատի մարզի Նորաշեն գյուղում սկսվել է բողոքի ակցիայով․ համայնքի բնակիչները պահանջում են չեղյալ հայտարարել իրենց մարզպետ Գարիկ Սարգսյանի կողմից կայացրած  այն որոշումը, որով դադարեցվել են համայնքի ղեկավար Նորայր Գրիգորյանի  լիազորությունները։

Լրագրողների հետ զրույցում Նորայր Գրիգորյանը նշեց, որ ինքը եղել է արձակուրդի մեջ, իսկ մարզպետի պաշտոն զբաղեցրած անձը քնել արթնացել և որոշել է, որ ինքը պետք է  իր լիազորությունները վայր դնի:

«Անօրինական, անհիմն, առանց ծանուցելու, առանց տեղյակ պահելու իմ լիազորությունները վայր են դնում։ Պահակն է երեկոյան զանգել ու տեղյակ պահել: Արդեն 1,5 տարի է, մարզպետի պաշտոնը զբաղեցնող անձը ձեռքերը մտցրել է մեր համայնք, ամբողջ համայնքը խառնել է իրար: Մանկապարտեզը երեք ամիս չի գործում, մարզպետի անօրինական կարգադրությամբ, առանց համայնքապետի ու ավագանու որոշման: Ամեն ինչը կազմակերպում է մարզպետը: Բազմիցս փորձել եմ հանդիպել, ընդհանրապես չի ընդունում: Անկեղծ ասած, անձնական խնդիր կա, խորհրդարանական ընտրությունների ժամանակ իրեն չեմ պաշտպանել, էդ օրվանից նստվածք է տվել»,- ասաց Գրիգորյանը՝ հիշեցնելով, որ իրեն դեռ մեկ տարի առաջ առաջարկել են անդամակցել «Քաղաքացիական պայմանագիր» կուսակցությանը, ինչից ինքը հրաժարվել է։

Factor.am-ին Արարատի մարզպետարանից փոխանցեցին, որ այս պահին Գարիկ Սարգսյանն ընդունել է բողոքի ակցիա իրականացնող նորաշենցիներին և խնդրի վերաբերյալ առավել հանգամանալից կարող են մանրամասներ հայտնել հանդիպման ավարտից հետո։