Բանակին հարվածը կլինի այն, եթե այդ արարքները հաստատվեն. քաղաքագետը՝ Վիգեն Սարգսյանի հայտարարության մասին. ՏԵՍԱՆՅՈՒԹ

Factor.am-ի հարցազրույցը քաղաքագետ Ռուբեն Մեհրաբյանի հետ

-Պարո՛ն Մեհրաբյան, Մարտի 1-ի գործը, կարծես, նոր ընթացք է ստանում: Մեղադրյալների թիվը վերջերս լրացվեց՝ միանգամից երեք մեղադրանք առաջադրվեց նախկին ոստիկանապետ Ալիկ Սարգսյանին: Ինչպե՞ս կգնահատեք այս պրոցեսը:

–Այս պահին ինձ բավարարում է գործի ընթացքը: Ինչ վերաբերում է Ալիկ Սարգսյանին, ես կարծում եմ, որ բացի նրանից՝ էլի ֆիգուրանտներ կան, որոնք պիտի ներգրավվեն այս ամենում: Սա ավելի շատ քննությունը վարող մարմնի գործառույթներից բխող հարց է: Սա, կարծում եմ, լուրջ քայլ է, և դատելով այս ամենից՝ ես կարծում եմ՝ ապագայում ամբաստանյալի աթոռին կտեսնենք նաև այլ անձանց:

-ՀՔԾ-ի հաղորդագրության մեջ նշվում էր նաև նախկին դատախազ Գևորգ Կոստանյանի անունը՝ որպես ենթադրյալ ապօինությունների մասնակից: Նա այն անձն էր, որը ժամանակին խոստանում էր՝ Մարտի 1-ի գործով «սայլը տեղից կշարժվի»: Ի՞նչ կասեք այս մասին:

–Դե մենք տեսնում էինք, որ սայլը տեղից չի շարժվում, և Կոստանյանը ևս այստեղ ասելիքներ կունենա: Դատելով մամուլից՝ դա տեղի կունենա տասնհինգ-քսան օր հետո:

-Պարո՛ն Մեհրաբյան, պաշտպանության նախկին նախարար Վիգեն Սարգսյանին որպես մեղադրյալ ներգրավվելու հիմքերի մասին հայտարարեց ՀՔԾ-ն: Մասնավորապես, զինծառայողներին բնակարանների բաշխման գործընթացում ենթադրյալ խախտումների մասին խոսվեց, ինքը՝ Վիգեն Սարգսյանն ասաց, որ դա հարված է բանակի ղեկավարության վարկանիշին: Դուք ի՞նչ կարծիք ունեք:

–Հարվածը կլինի այն, եթե այդ արարքները հաստատվեն, և հարվածը դա կատարողի կողմից է լինելու: Քննությունը պետք է իրական արդյունքը ցույց տա, և անմեղության կանխավարկածը պետք է հարգել:

–Անդրադառնանք նաև վերջին պաշտոնանկություններին: Պաշտոններին հրաժեշտ տվեցին ոստիկնանապետն ու ԱԱԾ տնօրենը: Եթե ոստիկանապետի գնալը հանդարտ էր, ապա ԱԱԾ տնօրենի դեպքում պատկերն այլ էր: Վանեցյան-Փաշինյան հակամարտություն սկսվեց, Վանեցյանը հայտարարեց, թե ինչ կլինի, եթե ինքն էլ սկսի առանց մտածելու խոսել: Ձեր կարծիքով՝ այս հակամարտությունը մինչև ո՞ւր կարող է հասնել և ինչի՞ հանգեցնել:

-Իմ կարծիքով՝ դա ոչ թե հակամարտություն, այլ ԱԱԾ պետի կողմից իրականության սխալ գնահատման արդյունք էր: Տպավորություն ունեմ, որ կրքերը հանդարտվում են: Համապատասխան դասեր կքաղեն թե՛ վարչապետը, թե՛ ԱԱԾ հաջորդ տնօրենը:

Մանրամասները՝ տեսանյութում:

Լիլիթ Շաբոյան