Նորակերտցիները երկաթգիծ են փակել, պահանջում են պետական հողերը բաժանել իրենց մեջ

Գեղարքունիքի մարզի Նորակերտ համայնքի բնակիչներն այսօր փակել են երկաթգիծը՝ պահանջելով համայնքին պատկանող հողերը  հավասարաչափ բաշխել բնակիչների մեջ։ Նշենք, որ երկաթգծից օգտվում է Սոթքի ոսկու հանքը:

Նորակերտցիները պնդում են, որ պետական ֆոնդի հողերը պետք է տրվեն իրենց, իրենք էլ այդ փոփոխության արդյունքում կկարողանան հողագործությամբ զբաղվել։

Գյուղացիների հետ զրուցելու եկավ համայնքի ղեկավար Գերասիմ Սարգսյանը և նշեց, որ պետական ֆոնդի հողերի համար հայտարարված է մրցույթ, իսկ ով արդյունքում հաղթի, նրան էլ այն բաժին կհասնի։ 

Սարգսյանը հորդորեց բացել երկաթգիծը՝ կրկնելով  պետական սեփականություն հանդիսացող հողերը բաժանելու իրավունք ինքը չունի և դրա համար հատուկ ընթացակարգ է պետք։

Նշենք, որ խնդրին իր ֆեյսբուքյան էջում անդրադարձել է նաև ԱԺ «Իմ քայլը» խմբակցության պատգամավոր Թագուհի Թովմասյանը։

«Այսօր առավոտյան ահազանգ եմ ստացել, որ 10:20-ից Գեղարքունիքի մարզի Նորակերտ համայնքի բնակիչները փակել են տեղի երկաթգիծը, որից օգտվում է Սոթքի ոսկու հանքը, և պահանջում են պետական ֆոնդի հողերը բաժանել գյուղացիների միջև, որպեսզի բոլորն էլ հող ունենան, և արդյունքում հավասարություն լինի:

Գնալով ահազանգի հետքերով և միաժամանակ հաշվի առնելով երկաթգծի խիստ կարևոր նշանակությունը՝ անմիջապես կապ ենք հաստատել ՀՀ տարածքային կառավարման և ենթակառուցվածքների նախարարություն, տեղեկացրել խնդրի մասին:

Կապ հաստատեցինք նաև Նորակերտ համայնքի ղեկավար Գերասիմ Սարգսյանի հետ, որն արդեն տեղյակ էր խնդրի մասին, և անմիջապես հասավ այնտեղ՝ գյուղացիների հետ խոսելու, խնդրի լուծման եզրեր գտնելու:

Տեղեկացնեմ, որ խնդիրն իրականում նոր չէ: Գյուղացիների հետ քննարկել եմ խնդիրը սույն թվականի սեպտեմբերի 7-ին՝ Նորակերտի բնակիչների հետ համայնքային հանդիպման ժամանակ և ասեմ, որ համալիր քննարկումների անհրաժեշտություն կա: Դա է նաև պատճառը, որ ՀՀ կառավարությունն այս մասով մինչ օրս որոշում չունի:

Հետևաբար հորդորում եմ գյուղացիներին բացել այս կարևոր երկաթգիծը և հնարավորություն տալ «Գեոպրոմայնինգ գոլդ» ընկերությանը՝ շարունակել աշխատանքը. Կառավարությունն արդեն տեղյակ է խնդրին, ակցիան հասել է իր նպատակին: Փոխմարզպետը կլինի համայնքում։ Իսկ արդյունքների մասին լրացուցիչ կհայտնեմ:

Ի դեպ, երկաթգիծը փակելու ակցիայի կազմակերպիչն ու մասնակիցներից շատերը աշխատում են Սոտքի ոսկու հանքում»,-նշել է նա: