10.01.2025 | 19:14
Ո՞վ է գլխավոր դատախազի տեղեկալի նախընտրելի թեկնածուն
Ազատության հրապարակը 20 օրով «բրոնյա» են արել. հնարավոր է՝ հանրահավաքներ լինեն
Քաղաքականություն
27.09.2019 | 14:10
Հոկտեմբերից Երևանում հանրահավաքներ և երթեր են նախատեսված: Երևանի քաղաքապետարանի պաշտոնական կայքից տեղեկանում ենք, որ «Սասնա Ծռերի» անդամ, Շուշիի գումարտակի ազատամարտիկ Արմեն Լուսինյանը իրազեկում է ներկայացրել հոկտեմբերի 1-ից մինչ 19-ն Ազատության հրապարակում հավաքներ անցկացնելու համար:
Հանրահավաքից հետո նախատեսվում է նաև երթ՝ Ազատության հրապարակ – Մաշտոցի պողոտա – Կորյունի փողոց – Նալբանդյան փողոց – Հանրապետության հրապարակ – Ամիրյան փողոց – Մաշտոցի պողոտա – Ազատության հրապարակ երթուղով:
Արմեն Լուսինյանը Factor.am-ի հետ զրույցում նշեց, որ հանրահավաքներն անցկացնելու են՝ քաղաքական զարգացումներով պայմանավորված, որի առանցքում լինելու է նաև Ամուլսարի հանքի շահագործման հարցը:
«Եթե հարկ համարենք ինչ-որ քայլ անել, նախօրոք զբաղեցնում ենք, որպեսզի կարողանանք այդ խնդիրը լուծել: Քաղաքական իրավիճակ ասելով՝ նկատի ունեմ նաև Ամուլսարի հանքի շահագործման հարցը: Եթե անցանկալի գործընթացներ լինեն հանքը շահագործելու իմաստով, գուցե անհրաժեշտություն լինի հասարակական իմաստով ակտիվանալու»,- ասաց նա:
Հարցին՝ ո՞ր քաղաքական ուժն է անցկացնելու հանրահավաքները, Արմեն Լուսինյանը պատասխանեց, որ չի կարող բացահայտել կազմակերպիչներին:
Նարեկ Կիրակոսյան
