06.06.2026 | 15:15
Մոտ 100 ընտրողի տրվել է 100 հազարից մինչև 500 հազար դրամ ընտրակաշառք․ 40 անձ ձերբակալվել է
Անկախության տոնին Գյումրին ավելի քան 15.000 մարդու է հյուրընկալել
Հասարակություն
25.09.2019 | 16:11
Սեպտեմբերի 21-ին Հայաստանի անկախության 28-ամյակի միջոցառումներին Գյումրին 15.000-20.000 հյուրի է սպասում: Ակնկալիքներն արդարացել են: Քաղաքում տոնական տրամադրություն էր, հյուրերի հոսքը՝ մեծ: Նշենք, որ սեպտեմբերի 20-22-ի համար քաղաքի հյուրանոցներում բոլոր սենյակները տեղերը վաղուց ամրագրված էին:
«15-20.000-ի մոտ էր հյուրերի թիվը, մի բան էլ ավելի: Ստույգ թիվ չկա, որ պաշտոնապես ներկայացնենք: Նախատեսված էր 15.000, բայց, իմ անձնական դիտարկումներով, հյուրերի թիվն ավելին էր: Արտասահմանից կային հյուրեր՝ հիմնականում սփյուռքի մեր հայրենակիցները, շատ էին նաև օտար զբոսաշրջիկները։ Հյուրերը գոհ էին և ուրախ»,- Factor.am-ի հետ զրույցում ասաց Գյումրու քաղաքապետարանի ծրագրերի և արտաքին կապերի բաժնի պետ Արմեն Հովհաննիսյանը:
Նրա խոսքով՝ Գյումրիում նման մասշտաբի միջոցառում չէր կազմակերպվել, երբ քաղաքը դրսից այսքան հյուր ունենար: Արտասահմանից ժամանած հյուրերից բացի՝ բազմաթիվ երևանցիներ ու հանրապետության այլ մարզերի բնակիչներ ևս առաջին անգամ եկել ու իրենց համար բացահայտել են Գյումրին:
«Բանից պարզվում է, որ սեպտեմբերի 21-ին անկախության տոնակատարության մասնակիցների մեջ հազարավոր երևանցիներ առաջին անգամ էին Գյումրի եկել: Հաշվի առնելով, որ միջոցառման հետ կապված արձագանքները հիմնականում դրական են, կարելի է ենթադրել, որ Գյումրին կդառնա ներքին տուրիզմի կարևորագույն ուղղություններից մեկը»,- իր ֆեյսբուքյան էջում գրել էր վարչապետի աշխատակազմի ղեկավար Էդուարդ Աղաջանյանը։
Նշենք, որ Անկախության տոնի գլխավոր միջոցառումներն այս տարի առաջին անգամ անցկացվեցին Գյումրիում, որի համար Կառավարությունը 220 մլն դրամ էր հատկացրել:
Տոնական միջոցառումները սկսվեցին «Մեր ժամանակի հերոսը» մրցանակաբաշխությամբ, որից հետո Գյումրիի տարբեր հատվածներում տեղի ունեցան տարաբնույթ միջոցառումներ: Դրանք ավարտվեցին գալա համերգով ու շքեղ հրավառությամբ:
Էմմա Չոբանյան
