Էդ խնդիրները չի կարելի ինձ հարցնել, գնացեք ավելի մանրերին հարցրեք. Գալուստ Սահակյանը՝ կուսակիցների մասին

Իշխող Հանրապետական կուսակցության փոխնախագահ Գալուստ Սահակյանը պնդում է՝ Հայաստանի հետագա կառավարումը պետք է իրականացնի նախագահ Սերժ Սարգսյանը:

«Դա միայն իմ տեսակետն է, ոչ կուսակցական տեսակետ է: Ես ասում եմ, որ երկրի հիմնական հետագա գործընթացները պետք է ղեկավարի Սերժ Սարգսյանը՝ այսօրվա մեր նախագահը»,- պատասխանելով Factor.am-ի հարցին՝ ասաց իշխող ՀՀԿ-ի փոխնախագահը:

Հիշեցնենք՝ օրեր առաջ վարչապետ Կարեն Կարապետյանը, անդրադառնալով Գալուստ Սահակյանի հայտարարությանը, որ երկրի հետագա ղեկավարումը պետք է հանձնել գործող նախագահ Սերժ Սարգսյանին, ասել էր. «Եկեք այսպես ասենք՝ մասնավոր անձանց կարծիքները թույլ տվեք չմեկնաբանեմ: Օֆիցիալ Հանրապետական կուսակցության կարծիքը երբ լինի՝ հարց տվեք: Դուք օֆիցիալ կարծիքը կուսակցության լսե՞լ եք՝ ոչ: Երբ որ լինի, այն ժամանակ կխոսեմ»:

ՀՀԿ փոխնախագահից հետաքրքրվեցին՝ չի՞ կարծում, որ այդ հայտարարությունը դուր չի եկել վարչապետ Կարեն Կարապետյանին, Սահակյանն ասաց. «Չեմ կարծում, որովհետև անընդհատ էլ տեսնում եմ վարչապետին և նման խոսակցություններ էլ չեն լինում՝ դուր եկա՞վ, թե՞ դուր չեկավ»:

Ի՞նչ նպատակով Կարեն Կարապետյանը նշանակվեց վարչապետի պաշտոնում, հարցրեցինք Հանրապետական կուսակցության փոխնախագահին, պատասխանն ուշագրավ էր. «Ինքը կշարունակի իր աշխատանքը, որովհետև ինքը ներկայացրել է շատ լավ նախագիծ, և ինքը կշարունակի այդ նախագիծը»:

Factor.am-ի հարցին՝ 2018 թվականից հետո ևս Կարեն Կարապետյանը կշարունակի՞ աշխատել, պարոն Սահակյանն ասաց՝ իհարկե կշարունակի: Սահակյանը, սակայն, չհստակեցրեց՝ վարչապետի պաշտոնը նկատի ունի՞, թե՞ ոչ:

Մանրամասները՝ տեսանյութում:

Շողիկ Գալստյան