ՊԵԿ նախագահ Դավիթ Անանյանն ԱԺ-ում ներկայացրեց Հարկային օրենսգրքում առաջարկվող փոփոխությունները․ ՏԵՍԱՆՅՈՒԹ

ՀՀ Կառավարության նախաձեռնությամբ այսօր՝ սեպտեմբերի 20-ին գումարվել է ԱԺ արտահերթ նիստ, որի օրակարգում ներառված է միայն Հարկային օրենսգրքում փոփոխություններ և լրացումներ կատարելու մասին նախագիծն առաջին և երկրորդ ընթերցմամբ ընդունելու մասին հարցը։

Պետական եկամուտների նախագահ Դավիթ Անանյանը խորհրդարանում ներկայացրեց առաջարկվող փոփոխությունները։ Կառավարության կողմից ներկայացված նախագծով առաջարկվում է ավելի քան 56 մլրդ դրամ Ավելացված արժեքի հարկի դեբետային մնացորդները վերադարձնել տնտեսավարողներին: Նախատեսվում է հետ վերադարձնել ինչպես նոր, այնպես էլ հին դեբետային մնացորդները:

Ըստ Անանյանի՝ առաջարկվում է պարզեցված ընթացակարգը կիրառել նաև ԱԱՀ-ի գծով բոլոր դեբետների վերադարձման պարագայում, չսահմանափակվել միայն զրոյական դրույքաչափով հարկվող գործարքների դեբետներով:

«Հին դեբետային գումարները, որոնք հետ չեն վերադարձվում, կազմում են ավելի քան 56 մլրդ դրամ: Պետությունն այդ պարտավորությունն ունի շուրջ 2.835 հարկ վճարողների համար: Նրանցից 2.571-ը գործող են, որոնց նկատմամբ պետության ունեցած պարտքը կազմում է 50 մլրդ 748 մլն դրամ»,- ասաց Անանյանը:

Ըստ նրա՝ մինչև 5 մլն դեբետային գումար ունեցողներին վերադարձը կատարվելու է առանց դիմումի և առանց ուսումնասիրություն իրականացնելու, 5-40 մլն դեբետային գումար ունեցողների համար կիրառվելու է պարզեցված ընթացակարգ, իսկ 40 մլն-ից բարձրի դեպքում՝ ուսումնասիրություն և ստուգում:

Մանրամասները՝ տեսանյութում: