Իշխանությունը նման պաշտոնական դիրքորոշում չունի. Աղաջանյանը՝ Արթուր Վանեցյանի և Միքայել Մինասյանի կապի մասին

Գործող իշխանությունն ԱԱԾ նախկին տնօրեն Արթուր Վանեցյանի և Սերժ Սարգսյանի փեսա Միքայել Մինասյանի միջև որևէ կապ չի տեսնում։ ՔՊ կուսակցության վարչության նիստից հետո վարչապետի աշխատակազմի ղեկավար Էդուարդ Աղաջանյանը պատասխանելով Factor.am-ի հարցին՝ արդյոք իշխանությունները նշյալ անձանց միջև որևէ կապ տեսնում են, ասաց․ «Այսօրվա իշխանությունը նման պաշտոնական դիրքորոշում չունի»:

Հիշեցնենք, որ ԱԱԾ նախկին տնօրեն Արթուր Վանեցյանը երեկ Factor.am-ին տված հարցազրույցում ասել էր՝ «Որևէ մեկը չփորձի ինձ կապել Միքայել Մինասյանի հետ»:

Վանեցյանի հրաժարականի աղմկահարույց տեքստից հետո վարչապետի մամուլի քարտուղար Վլադիմիր Կարապետյանը Factor.am-ի հետ զրույցում կոշտ դիրքորոշում էր հայտնել. «Պետք է պարզել, թե ով է գրել Արթուր Վանեցյանին վերագրվող այդ տեքստը: Հույս ունենք դրա հեղինակը քրեական պատասխանատվությունից «թյուրիմացաբար» խուսափած կոռուպցիոներների PR գրասենյակները չեն»։

Վլադիմիր Կարապետյանի այս հայտարարությանը հաջորդեց Արթուր Վանեցյանի հայտարարությունը, որ նման պնդումը միամտություն է, և որ այդ տեքստը գրվել է իր կողմից․ «Միքայել Մինասյանն ինձ համար մարդ է, որ պետք է շատ հարցերի պատասխան տա ՀՀ օրենքների առջև։ Կլինի քննություն, վարչապետը երեկ հայտարարեց, որ ընթանում է քննություն, և քննությունը պատասխան կտա՝ արդյոք Միքայել Մինասյանը պե՞տք է կանգնի օրենքի առջև, թե՝ ոչ»,- ասել էր նա:

Ի դեպ, Արթուր Վանեցյանի` քննարկումների առիթ դարձած հայտարարությունը հեռացվել է ԱԱԾ պաշտոնական կայքից և ֆեյսբուքյան պաշտոնական էջից:

Նարեկ Կիրակոսյան