Սվիտալսկին կոչ է անում իշխանություններին նախապատրաստվել Հայաստանի և ԵՄ-ի միջև վիզային ռեժիմի ազատականացման աշխատանքներին

Հայաստանում Եվրամիության պատվիրակության ղեկավար, դեսպան Պյոտր Սվիտալսկին վստահ է՝ Բրյուսելյան գագաթնաժողովից հետո Հայաստանի համար դրական նորություններ կլինեն: «Արևելյան գործընկերության ապագան. մարտահրավերներ և հեռանկարներ» թեմայով քննարկմանը դեսպանը միևնույն ժամանակ անդրադարձավ Եվրամիության և Հայաստանի միջև վիզային ռեժիմի ազատականացման գործընթացին՝ Հայաստանին հորդորելով սկսել դրա նախապատրաստական աշխատանքները:

«Սկսեք ձեր ներքին նախապատրաստական աշխատանքները, այդ օրվան պատրաստվեք, որովհետև Վրաստանի, Ուկրաինայի և Մոլդովայի փորձը ցույց է տալիս, որ յուրաքանչյուր պետություն պետք է լուրջ փոփոխություն իրականացնի օրենսդրական դաշտում, վարչական պրակտիկայի իմաստով, որպեսզի կարողանա ապահովել անհրաժեշտ պահանջների կատարումը: Այնպես, որ ժամանակ մի կորցրեք, կատարեք ձեր տնային աշխատանքը, ու ես հուսով եմ այդ օրը կգա»,- ընգծեց ԵՄ դեսպանը:

Ուկրաինայում վիզային ռեժիմի ազատականացման գործընթացին ակտիվ մասնակցություն ունեցած «Եվրոպան առանց սահմանների» հասարակական կազմակերպության ղեկավար Իրինա Սուշկոյի խոսքով՝ Հայաստանը վիզայի ռեժիմի ազատականացման հարցում ճիշտ ուղու վրա է, սակայն թե ինչ ժամկետներում շոշափելի արդյունք կունենանք, Ուկրաինայի ներկայացուցիչը դժվարացավ պատասխանել:

Լեհաստանի ներկայացուցիչ Կարոլինա Զբիտնևսկան էլ անդրադառնալով Հայաստան-Եվրամիություն համաձայնագրի ստորագրմանը՝ ընդգծեց, որ այն էապես տարբերվում է Ասոցացման համաձայնագրից:

Հիշեցնենք՝ նոյեմբերին Բրյուսելում տեղի կունենա Եվրամիության Արևելյան գործընկերության գագաթնաժողովը, որի ընթացքում նախատեսվում է, որ կստորագրվի Եվրամիության և Հայաստանի միջև համապարփակ և ընդլայնված գործընկերության համաձայնագիրը:

Լեհաստանի ներկայացուցչի խոսքով՝ մտավախություն, այդուահանդերձ կա, որ վերջին պահին Հայասատնը որոշումը կփոխի:

Մանրամասները՝ տեսանյութում:
  

Շողիկ Գալստյան