Ինչի՞ եք ընկել վարորդների հետևից․ ԲՀԿ-ական պատգամավորը՝ «Իմ քայլի» գործընկերոջը․ ՏԵՍԱՆՅՈՒԹ

Ազգային ժողովի «Իմ քայլը» խմբակցության պատգամավոր Սիսակ Գաբրիելյանն ու Արմեն Փամբուխչյանը հեղինակել են օրենքի նախագիծ, որով առաջարկվում է փոփոխություն կատարել «Տեսանկարահանող կամ լուսանկարահանող սարքերով հայտնաբերված ճանապարհային երթևեկության կանոնների խախտումների վերաբերյալ գործերով իրականացվող վարչական վարույթի առանձնահատկությունների մասին»  օրենքում։

Նախատեսվող փոփոխություններով՝ հնարավորություն է տրվում քաղաքացիներին տեսանկարահանել ճանապարհային երթևեկության կանոնների խախտումներն և օնլայն ռեժիմով փոխանցել Ոստիկանությանը, իսկ տեսանյութն ուղարկած քաղաքացու ինքնությունը գաղտնի է մնալու։

Նախագծի վերաբերյալ «Բարգավաճ Հայաստան» խմբակցության պատգամավոր Արթուր Գրիգորյանը հարց հնչեցրեց՝ մենք ինչո՞ւ ենք ընկել վարորդների հետևից։

«Ես զարմանում եմ, որ ասում են, թե էս նախագիծը լավն է, սա շատ վատ նախագիծ է։ Հիմա ինչո՞ւ ենք ընկել էս վարորդների հետևից։ Մի հատ բալային համակարգ ենք ներդնում,  բացի բալ հանելը տուգանում ենք, հիմա էլ ասում ենք՝ վերցրեք հեռախոսներն ու ընկեք վարորդների հետևից»,- ասաց Գրիգորյանը՝ մտահոգություն հայտնելով, որ նույն վարորդը կարող է նույն տուգանքի համար մի քանի անգամ նկարվել և այս պարագայում հարց է առաջանում՝ ո՞ր խախտումն է Ոստիկանությունն արձանագրելու։

«Էս շիլաշփոթն ինչպե՞ս է կարգավորվելու»,- հարցրեց Գրիգորյանը։

Ի պատսխան, նախագծի զեկուցող Սիսակ Գաբրիելյանը պատգամավորին հավաստիացեց՝ խախտումների կադրերը հայտնվելու են օրենքը կարդացած մարդկանց ձեռքում և նույն տուգանքի համար քաղաքացին մի քանի անգամ չի կարող տուգանվել։

Մանրամասները՝ տեսանյութում։