Ոստիկանապետի չափանիշներին Քրիստինե Պողոսյանը համապատասխանում է՝ ըստ ԼՀԿ-ական պատգամավորի․ ՏԵՍԱՆՅՈՒԹ

Ազգային ժողովի «Լուսավոր Հայաստան» խմբակցությունն առաջարկում է փոփոխություն կատարել «Ազգային անվտանգության մարմիններում ծառայության մասին» ՀՀ օրենքում և՛ Ազգային անվտանգության ծառայության տնօրենի, և՛ Ոստիկանության պետի պաշտոնները համարել քաղաքական պաշտոն՝ այդ պաշտոններում նշանակվող անձանց համար սահմանելով պատգամավորի թեկնածուին ներկայացվող պահանջները:

Ազգային ժողովի «Իմ քայլը» խմբակցության պատգամավոր Քրիստինե Պողոսյանը «համարձակությունը հավաքեց» ու նախագծի զեկուցող, ԼՀԿ-ական պատգամավոր Տարոն Սիմոնյանից հետաքրքրվեց՝ ինչպե՞ս կվերաբերվեն վերջինս ու նրա քաղաքական թիմը, եթե իշխող ուժը ՀՀ ոստիկանապետի պաշտոնում առաջադրի իրեն՝ խիստ քաղաքականացված ու կուսակցական Քրիստինե Պողոսյանին։

«Ասում են՝ մանդատդ դի՛ր, գնա՛ ոստիկանապետ։ Իշխանական ուժը կարծում է՝ դու այդտեղ ավելի օգտակար ես։ Ինչպե՞ս կվերաբերվեք»,-հարցրեց Պողոսյանը։

Ի պատասխան Տարոն Սիմոնյանն ասաց․ «Ձեր պարագայում, բնականաբար, ծափողջույններով կառաջնորդվենք, բայց եթե կոնկրետ Ձեր հարցին պատասխանեմ, ապա մենք նաև առաջնորդվում ենք ողջամտության և ողջախոհության չափանիշներով։ Ձեր պարագայում ամբողջությամբ համապատասխանում է ողջախոհության չափանիշներին»,- ասաց  Սիմոնյանը՝ հավելելով, որ եթե իրենք գտնեն, որ պաշտոնի հավակնորդ անձը կոմպետենտ չէ, պետք է քննադատեն։

«Բայց փաստացի գործիքակազմ եք տալիս, որից հետո ընդդիմանաք, թե՝ չէ, որևէ բան չի տա, եթե ես գնամ ոստիկանապետ»,- ասաց Պողոսյանը՝ խնդրահարույց համարելով նախագծով առաջարկվող այդ դրույթը, որ ԱԱԾ տնօրենի և ոստիկանապետի պաշտոնի հավակնորդի համար բարձրագույն կրթության առկայությունը պարդադիր չէ։

Մանրամասները՝ տեսանյութում։

Աղավնի Սուքիասյան