Հակառակորդը, երբ ակտիվ մարտական գործողություններ չի իրականացնում, մենք միշտ այս իրավիճակն ենք ունենալու. ՊՆ խոսնակը՝ ներբանակային զոհերի մասին. ՏԵՍԱՆՅՈՒԹ

Հելսինկյան քաղաքացիական ասամբլեայի Վանաձորի գրասենյակի զեկույցի համաձայն՝ այս տարվա առաջին կիսամյակում բանակում 31 մահվան դեպք է արձանագրվել, որից միայն երկուսն է հակառակորդի գործողությունների արդյունքում:

Մահացություններից 11-ը ավտովթարի հետևանքով են, 3-ը՝ առողջական խնդիրների, 3-ը՝ սպանության, 3-ը՝ ինքնասպանության կամ ինքնասպանության հասցնելու: Ստացվում է, որ զինվորների միջանձնային հարաբերությունների արդյունքում զոհերի թիվն ավել է հակառակորդի կրակոցների հետևանքով զոհերի թվից:

Այսօր հրավիրված ասուլիսում Factor.am-ը պաշտպանության նախարարի մամուլի խոսնակ Արծրուն Հովհաննիսյանից հետաքրքրվեց՝ ՊՆ-ն ի՞նչ ծրագրեր է իրականացնում, որ միջանձնային հարաբերությունների արդյունքում զոհեր չունենանք:

«Ես միգուցե շատ ցավոտ բան պետք է ասեմ, բայց երբ հակառակորդն ակտիվ մարտական գործողություններ չի իրականացնում, մենք միշտ այս իրավիճակն ենք ունենալու: Ուզո՞ւմ ենք, որ ամեն տարի հակառակորդից շատ զինվոր զոհվի, այդպես չլինի: Մենք էլ ենք ուզում, որ ընդհանրապես մարդ չզոհվի: Զինված ուժերը շատ մեծ կառույց է, 70 հազար մարդ ամեն առավոտ ելնում է, նստում է իր մեքենան, տանկը և ինչ-որ գործ է անում: Զենքի հետ գործ ունի, էքստրիմի հետ գործ ունի և այլն: ԶՈՒ-ում ամեն օր ամեն ինչ անում են, որ մեկ հոգու մատն էլ չտրորվի, բայց ամեն օր մի քանի տասնյակ հազար մարդ զենքից ու տեխնիկաներից է օգտվում, այս պարագայում զրոյացնել ամեն ինչը շատ դժվար է»,- ասաց Հովհաննիսյանը:

Նրա խոսքով՝ ստեղծված իրավիճակը չի արդարացնում, բայց իրավապաշտպան կառույցներին առաջարկում է բերել օրինակներ, երբ կիսապատերազմող երկրներում, որտեղ ռազմական գործողություններ են տեղի ունենում և զոհեր չկան:

Մանրամասները՝ տեսանյութում:

Նարեկ Կիրակոսյան