Տեղյա՞կ է արդյոք Սամվել Կարապետյանն իրեն Ազգային հերոսի կոչում շնորհելու առաջարկի մասին

«Հայոց արծիվներ» հայրենասիրական հասարակական կազմակերպության հիմնադիր Խաչիկ Ասրյանն իր և իր ղեկավարած ՀԿ-ի անունից առաջարկում է ՀՀ Ազգային հերոսի կոչում շնորհել «Տաշիր» ընկերության հիմնադիր Սամվել Կարապետյանին։

Factor.am-ի հետ զրույցում Խաչիկ Ասրյանը պարզաբանեց․ քանի որ Սամվել Կարապետյանը Հայաստանում և Արցախում իրականացրել է սոցիալական, կրթական, առողջապահական բազմաթիվ ծրագրեր, իրենք դիմել են ՀՀ նախագահ Արմեն Սարգսյանին՝ սեպտեմբերի 21-ին՝ անկախության 28-րդ տարեդարձի օրը, «Տաշիր» ընկերության հիմնադիր Սամվել Կարապետյանին «Հայաստանի Հանրապետության Ազգային հերոս»-ի կոչում շնորհելու առաջարկով։

Նշենք, սակայն, որ Խաչիկ Ասրյանից հետաքրքրվեցինք՝ իրենց նախաձեռնության մասին տեղյակ պահե՞լ են արդյոք Սամվել Կարապետյանին, լսել են արդյոք իրենց այս առաջարկի վերաբերյալ վերջինիս տեսակետը։

Ի պատասխան Ասրյանը նշեց, որ ո՛չ ինքը, ո՛չ «Հայոց արծիվները» Սամվել Կարապետյանի հետ կապ և շփում չունեն, նրա հետ իրենց նախաձեռնության մասին չեն խոսել։

Հարցին՝ չկա՞ մտավախություն, որ գուցե Կարապետյանը դեմ է իրենց նախաձեռնությանը, Ասրյանը պատասխանեց․ «Նման մտավախություն չունենք։ Սամվել Կարապետյանին Ազգային հերոսի կոչում շնորհելու առաջարկը բացառապես մեր համոզմունքն է և ոչ միայն մեր, վստահ եմ՝ ողջ ազգի։ Կարապետյանն արժանավորներից է»։

Դիտարկմանն էլ՝ չե՞ն վախենում այդ առաջարկի համար սուր քննադատության արժանանալուց, Ասրյանը արձագանքեց․ «Նման մտավախություն էլ չունենք։ Նման արժանի և անհրաժեշտ նախաձեռնությունը կարող է քննադատել միայն հայատյաց ադրբեջանցին»։

Հավելենք, որ ըստ նոր Սահմանադրության՝ հերոսի կոչում շնորհելու միջնորդությամբ կարող են հանդես գալ ՀՀ վարչապետը, ԱԺ նախագահը, ՍԴ և ԲԴԽ նախագահները։

Վարչապետը Հայաստանի Հանրապետության պետական պարգևներով պարգևատրելու կամ պատվավոր կոչումներ շնորհելու վերաբերյալ միջնորդությամբ դիմում է սեփական նախաձեռնությամբ և Սահմանադրությամբ նախատեսված մարմինների, ինչպես նաև քաղաքացիների,  իրավաբանական անձանց առաջարկությունների հիման վրա:

Այժմ «Հայոց արծիվներ»-ը և Խաչիկ Ասրյանը պատրաստվում են այդ հարցով դիմել ԱԺ նախագահ Արարատ Միրզոյանին։

Հավելենք, որ վերջին երկու տարում Ազգային հերոսի կոչում շնորհվել է արգենտինահայ գործարար Էդուարդո Էռնեկյանին՝ Հայաստանի շենացմանն ու բարգավաճմանն ուղղված գործունեության համար և դիրիժոր Հովհաննես Չեքիջյանին՝ Հայաստանն աշխարհին ներկայացնելու ազգանվեր գործում դրսևորած անմնացորդ նվիրումի, մշակույթի բնագավառում ներդրած անձնական մեծ ավանդի, ինչպես նաև հայ ժողովրդին մատուցած բացառիկ ծառայությունների համար:

Աղավնի Սուքիասյան