Ընդդիմությունը 20 հոգուց ավելի մարդ չի կարողանում հավաքել. Նիկոլ Փաշինյանի խոսնակը՝ թեժ աշնան մասին. ՏԵՍԱՆՅՈՒԹ

Քանի դեռ Ամուլսարի հարցով որոշումը վերջնական չէ, ես չեմ կարող հստակ ասել, թե որոնք կլինեն հետագա գործողություններն այս ուղղությամբ: Այս մասին Կառավարության նիստից հետո լրագրողների հետ զրույցում նշեց վարչապետի մամուլի խոսնակ Վլադիմիր Կարապետյանը:

«Կարող եմ հավաստիացնել, որ քննարկումները շարունակվում են, և առաջիկայում պատկան մարմինները կանդրադառնան հարցին: Վարչապետը հանձնարարել էր Շրջակա միջավայրի նախարարությանը պատրաստել իրենց մոտեցումները նոր ՇՄԱԳ-ի վերաբերյալ: Նախարարը ներկայացրել է իր մոտեցումները այդ հարցի վերաբերյալ»,- ասաց նա:

Դիտարկմանը, որ պաշտոնական հաղորդագրությունից պարզ չի դառնում, թե, ի վերջո, նոր ՇՄԱԳ-ի կարիք կա՞, թե՞ ոչ, մամուլի խոսնակն արձագանքեց. «Մեր հաղորդագրության մեջ հստակ պատասխան չի տրվում, որովհետև վերջնական որոշում և վերջնական պատկերացում չկա: Երբ վերջնական լինեն քննարկումները, մենք այդ մասին կհայտարարենք»:

Անդրադառնալով ընդդիմադիրների այն հայտարարություններին, որ քաղաքական առումով թեժ աշուն է սպասվում Հայաստանում և չի բացառվում, որ փողոցում լուծվի իշխանափոխության հարցը, Վլադիմիր Կարապետյանն ասաց. «Ես լուրջ չեմ վերաբերվում այդ հայտարարություններին: Ընդդիմությունը քսան հոգուց ավելի մարդ չի կարողանում հավաքել»:

Նիկոլ Փաշինյանի խոսնակն անդրադարձավ նաև ՍԴ-ի Ռոբերտ Քոչարյանի գործի որոշմանը: Նա ասաց, որ իրավաբանները պետք է մեկնաբանություն տան: «Որոշակի յուրահատկություններ ունի այդ որոշումը, կարծում եմ, որ իրավաբանները շատ ավելի ճիշտ մեկնաբանություն կտան»,- նշեց Կարապետյանը:

Մանրամասները՝ տեսանյութում:

Նարեկ Կիրակոսյան