Խնդիրը Ամուլսարի հանքը փակել կամ բացելու մեջ չէ․ պետք է հասկանալ ինչ է մեզ սպասվում․ Թևան Պողոսյան

Հանրապետության նախագահ Արմեն Սարգսյանն Ամուլսարի խնդրի վերաբերյալ արդեն արտահայտել  է իր դիրքորոշումը․ դեռևս նախորդ շաբաթ էր այդ մասին խոսել՝ նշելով, որ պետք է մշակել այնպիսի ծրագրեր, որ կարողանանք կանաչ տնտեսության զարգացմանը զարկ տալ, բայց դրա հետ միասին պետք է բարենպաստ լուծումներ տալ Ամուլսարի հարցին։

Այս մասին այսօր հրավիրված մամուլի ասուլիսի ժամանակ ասաց «Մարդկային զարգացման միջազգային կենտրոնի» նախագահ Թևան Պողոսյանը՝ անդրադառնալով Ամուլսարի հանքի շահագործման վերաբերյալ նախագահ Արմեն Սարգսյանի դիրքորոշմանը։

Ըստ Պողոսյանի՝  ցանկացած որոշման կայացման համար կարևոր է հաշվի առնել մեր կողմից կիրառվող գործողությունների արդյունքները։ «Ամեն մի գործողություն ունի իր արդյունքները։ Այդ արդյունքները արդյոք մեզ համար պա՞րզ են։ Եթե բացում ենք հանքը, ի՞նչ ենք անում և եթե փակում ենք,  ինչե՞ր են մեզ սպասվում, և ինչպե՞ս ենք դրան պատրաստվում»,- ասաց նա։

«Մարդկային զարգացման միջազգային կենտրոնի» նախագահը նշեց, որ շատերը արբիտրաժով են վախեցնում, բայց Հայաստանը մեկ անգամ չէ, որ եղել է արբիտրաժային դատարանում և կարողացել է շահել։

Թևան Պողոսյանն անդրադարձավ նաև արցախյան բանակցային գործընթացին՝ նշեով  Արցախը բանակցային սեղանի շուրջ վերարդարձնելու կարևորությունը։ «Հայաստանի կողմից ամեն անգամ արված հայտարարություններին Ադրբեջանը փորձել է ագրեսիվ հակազդել, մեծ հույսեր չունեմ բանակցային գործընթացից՝ այսօրվա դրությամբ։ Ադրբեջանը հասկանում է միայն մեկ լեզու՝ ուժի լեզուն։ Եթե լինենք միշտ իրենցից մեկ քայլ առաջ, ապա կպահպանենք իրավիճակը։ Եթե Ադրբեջանը զգաց, որ թեկուզ մեկ միլիմետր մեզանից առաջ է, կարող է գնալ տարբեր սրացումների»,- ասաց նա։