08.11.2026 | 00:09
Կրակոցներ Կրակովի կենտրոնում․ զոհերի թիվը հասել է 6-ի, կա 15 վիրավոր
Քննչական կոմիտեն ի՞նչ է պահանջել «Էլարդից» և արդյոք 2016 թ․ ՇՄԱԳ-ը բավարա՞ր է Ամուլսարի հանքը շահագործելու համար
Հասարակություն
30.08.2019 | 13:43
Երեկ Կառավարությունում տեղի ունեցավ սկայպ-կոնֆերանս ELARD ընկերության փորձագետների, իշխանության անդամների և «Լիդիան Արմենիա» ընկերության ներկյացուցիչների մասնակցությամբ։
ELARD ընկերության փորձագետները հայտնեցին, որ իրենք փորձաքննության ընթացքում ՀՀ քննչական կոմիտեից ստացել են մեկ լրացուցիչ նամակ, որոով իրենց տրվել է այնպիսի հանձնարարական, որը նախապես արձանագրված չի եղել պայմանագրում։ «Դա իսկապես նշված չէր մեր պայմանագրի մեջ։ Էլեկտրոնային նամակով նման խնդրանք ունենք»,- ասաց փորձագետը։
Վարչապետ Փաշինյանն էլ նրան առաջարկեց հենց տեսակոնֆերանսի ընթացքում Քննչական կոմիտեից ստացված նամակն ուղարկել Կառավարության աշխատակազմ, որպեսզի իրենք հասկանան, թե ինչի մասին է խոսքը։
ՀՀ քննչական կոմիտեի Ամուլսարի գործով քննչական խմբի ղեկավար Յուրա Իվանյանն էլ մանրամասն ներկայացրեց այդ նամակի պատմությունը։
Ըստ Իվանյանի՝ Քննչական կոմիտեն փորձագետներին խնդրել է լրացուցիչ պարզաբանել վերահսկելի՞ են հանքի շահագործման արդյունքում հնարավոր ռիսկերը, թե՝ ոչ, եթե ոչ, ապա դրանք կարո՞ղ են դառնալ վերահսկելի։
«Դրական եզրակացությունը ստացվել է տարբեր մարմինների եզրակացությունների հիման վրա։ Եվ տվյալ հանգամանքում թաքցնելու կամ չբացահայտելու դիտավորություն չկա։ Քննչական գործով նման տվյալ ձեռք չի բերվել»,- ասաց քննչական խմբի ղեկավարը։
Տեսակոնֆերանսի ժամանակ ՀՀ շրջակա միջավայրի նախարար Էրիկ Գրիգորյանն էլ փորձագիտական եզրակացություն տված ընկերության ներկայացուցչից հետաքրրքրվեց՝ արդյոք գործող ՇՄԱԳ-ով բավարար չէ՞ աշխատանքներ իրականացնելը և արդյոք 2016 թվականի ՇՄԱԳ-ը և նախագիծն ուսումնասիրելով՝ ELARD-ը համարո՞ւմ է, որ դա բավարար է։
Փորձագետները պատասխանեցին, որ 2016 թվականի ՇՄԱԳ-ը և նախագիծը բավարար չեն ապահով հանք շահագործելու համար, և դա հստակ փաստաթղթավորված է նրանց գնահատման եզրակացության մեջ։
«Տվյալ պահին մենք համաձայն չենք նրան, որ այս միջոցները կարելի է հինգ տարի հետո մեկնարկել, գուցե 6 ամիս, 1 տարի, 2 տարի, բայց, եթե ես ամեն ինչ ճիշտ եմ հասկանում, խոսքը վերբերում է մաքրման կայանի համակարգի օգտագործմանը, ապա դա հետաձգել չի կարելի, մենք համարում ենք, որ ազդեցության գնահատումը պետք է թարմացվի, արդիականացվի, և մի շարք ուսումնասիրություններ պետք է կա՛մ ընդլայնվեն, կա՛մ վերանայվեն, և միայն այդ դեպքում ժամկետի մասին կարելի է խոսել։ Այսօրվա տվյալները թերի են, որպեսզի վստահ հնարավոր լինի ասել ժամկետը»,- ասաց փորձագետը։
