Ազգային ժողովում փոշմանել են. կառուցվածքային աղմկոտ փոփոխությունից հետ են կանգնում

Ազգային ժողովում մտափոխվել են եւ հետ կանգնել աշխատակազմում կատարվելիք փոփոխություններից, որոնք դժգոհությունների պատճառ էին դարձել:

Ազգային ժողովի նախագահ Արարատ Միրզոյանն այսօր ստորագրել է մի կարգադրություն, որով անվավեր են ճանաչվել Հայաստանի Հանրապետության Ազգային ժողովի նախագահի 2019 թվականի օգոստոսի 9-ի Կ-225-Ա եւ Կ-226-Ա կարգադրությունները:

Սրանք այն կարգադրություններն էին, որոնցով Ազգային ժողովի աշխատակազմում նախատեսվում էին փոփոխություններ: Խոսքը, մասնավորապես, կառուցվածքային փոփոխությունների եւ կադրային կրճատումների մասին է:

Հիշեցնենք, որ ԱԺ խորհրդի նիստում ընդունվել էր մի նախագիծ, որի համաձայն ԱԺ իրավական փորձաքննության վարչությունը և տնտեսագիտական փորձաքննության վարչությունը միաձուլվում էին, փոխարենը ստեղծվում էր փորձագիտական և վերլուծական վարչություն:

Բացի այդ՝ դադարեցվում էր տեղեկատվական և վերլուծական վարչության գործունեությունը, ինչպես նաեւ լրատվության և հանրության հետ կապերի վարչության գործունեությունը, որի փոխարեն ստեղծվելու էր հասարակայնության հետ կապերի և հաղորդակցության վարչություն:

Ծրագրված փոփոխություններով քաղաքացիների ընդունելության և նամակների բաժինը և ընդհանուր բաժինը միավորվելու էին, ստեղծվելու էր քաղաքացիների ընդունելության և փաստաթղթաշրջանառության վարչություն: Այս ամենի շրջանակներում բազմաթիվ աշխատակիցներ ուղարկվել էին կադրային ռեզերվ եւ հիմա Արարատ Միրզոյանի նոր կարգադրության համաձայն բոլոր աշխատակիցները վաղվանից ունենալու են այն կարգավիճակն, ինչ ունեին օգոստոսի 9-ին:

Ռեզերվում գտնվող աշխատակիցները Factor.am-ին ասացին, որ ԱԺ կադրերի բաժնից դեռ աշխատանքի վերադառնալու զանգ չեն ստացել: Ազգային ժողովի նախագահ Արարատ Միրզոյանն այսօր խորհրդարանի այգում լրագրողների հետ զրույցի ընթացքում չցանկացավ պատասխանել հարցին, թե այս որոշումն ինչով է պայմանավորված։ ԱԺ աշխատակազմի ղեկավար Տիգրան Գալստյանն էլ նշեց, որ ԱԺ կայքում հրապարակված է նախագահի համապատասխան կարգադրությունը:

Մյուս հարցերն առաջարկեց ուղղել գրավոր: Աշխատակազմի որոշ ներկայացուցիչներ մասնավոր զրույցներում նշում էին, որ ղեկավարության այս հետքայլը պայմանավորված է տարբեր իրավաբանների բարձրաձայնած խնդիրներով:

Նարեկ Կիրակոսյան