27.09.2026 | 18:38
Հաղորդում է ներկայացվել հանցագործության մասին. ՀԷՑ-ը՝ ենթակայանում բռնկված հրդեհի մասին
Բռնաճնշումների ենթարկված անձանց իրավունքների պաշտպանության գործընթացում պետությունը պետք է ունենա հստակ դիրքորոշում. Գեմաֆին Գասպարյան
Քաղաքականություն
23.08.2019 | 21:50
ՀՀ աշխատանքի և սոցիալական հարցերի նախարարի առաջին տեղակալ Գեմաֆին Գասպարյանը հանդիպել է բռնադատվածի կարգավիճակ ունեցող անձանց իրավունքների պաշտպանության խնդիրներով զբաղվող փորձագետների և քաղաքացիական հասարակության անդամների հետ:
Նպատակն էր քննարկել «Բռնադատվածի կարգավիճակ ունեցող անձանց իրավունքների և սոցիալական պաշտպանության մասին» ՀՀ օրենքի նախագիծը: 1993 թվականից գործող օրենքի որոշակի դրույթներ այսօր կորցրել են արդիականությունը, և պետության կողմից ստանձնված պարտավորություններն իրականացվում էին մասնակի:
«Օրենքի փոփոխության պատճառները, հիմնականում, մի քանիսն են՝ ստեղծել սոցիալական այնպիսի համակարգ, որտեղ ստանձնած պարտավորությունները հնարավորություն կունենան իրագործվելու, իսկ բռնաճնշումների ենթարկված անձանց իրավունքների պաշտպանության գործընթացում պետությունն ունենա իր հստակ դիրքորոշումը»,- հավելել է նախարարի առաջին տեղակալը:
Գեմաֆին Գասպարյանը մանրամասնել է նոր օրինագծի նպատակը, այն է՝ վերականգնել խորհրդային կարգերի ժամանակաշրջանում քաղաքական դրդապատճառներով անձի իրավունքների և ազատությունների կոպիտ ոտնահարմամբ, քաղաքական, կրոնական և այլ համոզմունքների համար, սոցիալական, ազգային խտրականության դրսևորմամբ բռնադատված անձանց անօտարելի իրավունքների վերականգնումը, փոխհատուցել բռնադատման հետևանքով պատճառված վնասը:
Հանդիպման մասնակիցները ներկայացրել են իրենց հարցադրումներն ու մտահոգությունները, առաջարկել հստակեցումներ կատարել բռնադատվածի կարգավիճակ ունեցող անձանց և նրանց իրավահաջորդների իրավունքների իրացման գործընթացում:
Պայմանավորվածություն է ձեռքբերվել ներկայացված նախագծի վերաբերյալ սեղմ ժամկետում նախարարություն ներկայացնել առաջարկություններ և դիտարկումներ, որոնք անհարժեշտության դեպքում կներառվեն փաստաթղթում:
