Սպորտից՝ քաղաքականություն․ ինչու Դավիթ Սարգսյանը որոշեց առաջադրվել որպես Ստեփանակերտի քաղաքապետի թեկնածու

Սեպտեմբերի 8-ին Արցախում կկայանան ՏԻՄ ընտրություններ։ Արցախի մայրաքաղաք Ստեփանակերտի ղեկավարի պաշտոնի համար առաջադրվել է  5 թեկնածու։

Factor.am-ը զրուցել է թեկնածուներից Դավիթ Սարգսյանի հետ, ով անկուսակցական է, «Քոնսալթ ֆինանս գրուպ» ՍՊ ընկերության հիմնադիրն ու Արցախի Քիք-Բոքսինգի ֆեդերացիայի նախագահը։

– Պարո՛ն Սարգսյան, ինչո՞ւ եք որոշել սպորտից ու բիզնեսից անցում կատարել քաղաքականություն։

-Շատ հետաքրքիր հարցից սկսեցիք: Այսպես կասեմ՝ քաղաքապետի առաջնահերթ գործը քաղաքի բազմաշերտ խնդիրները լուծելն է, լավ կառավարիչ լինելը, իսկ այդ որակներն իմ մեջ կան: Որոշումս պայմանավորված է նրանով, որ արդեն 13 տարուց ավելի է՝ լինելով անշարժ գույքի գնահատման ընկերության հիմնադիրն ու տնօրենը, աշխատանքի բերումով քաղաքացիների հետ ամենօրյա, ամենժամյա շփման արդյունքում տեղյակ եմ քաղաքացիներին մտահոգող հարցերին: Բացի այդ աշխատանքս հնարավորություն է տվել լինել, եթե սխալ չասեմ, ստեփանակերտցիներից շատերի թաղամասում, բնակարանում կամ տանը, ծանոթանալ ամեն անկյան ու խնդրի: Դա է պատճառը, որ առավելագույնս տեղյակ եմ քաղաքում առկա խնդիրներին, ավելին՝ հստակ պատկերացնում եմ այդ խնդիրները լուծելու ուղիներն ու միջոցները, ինչը և հիմնական պատճառն է իմ որոշման` երիտասարդ, բանիմաց թիմով մասնակցել քաղաքապետի ընտրություններին` առաջադրելով իմ թեկնածությունը: Պետք է նշեմ, որ ընտրվելու դեպքում չեմ պատրաստվում հրաժարվել սպորտից, հասարակական գործունեությունից:

-Իսկ ի՞նչ եք առաջարկում ստեփանակերտցուն և ունեք արդյոք քաղաքի զարգացման ռազմավարական պլան, որոնք են Ստեփանակերտ քաղաքի հրատապ խնդիրները, որոնք պատրաստ եք լուծել։ 

-Իմ կարծիքով, մեր նախընտրական ծրագրում ընգրկված կետերը քաղաքի առաջընթացի, զարգացման կարևոր նախապայման են, և որդեգրված քաղաքականությունը շարունակությունն է այն սկսված ծրագրերի, որոնք կոչված են քաղաքի համաչափ զարգացումը ապահովելուն:  Եվ հենց այդ է պատճառը, որ մեր նախընտրական ծրագրի առաջին կետը հենց Ստեփանակերտի զարգացման ռազմավարական ծրագրի մշակումն է: Բոլոր կետերն էլ կարևոր նշանակություն ունեն՝ սկսած քաղաքի կառավարման համակարգից, քաղաքաշինությունից, սոցիալ տնտեսական զարգացումից, բնապահպանությունից, կանաչապատումից մինչև շենքերի տանիքների վերանորոգում ու հանրային սանհանգույցների ստեղծում:

-Ինչ ֆինանսավորմամբ եք անցկացնելու քաղաքապետի ընտրությունների քարոզարշավը՝ սեփական միջոցներով, թե գտել եք հովանավորներ։

-Պաշտոնապես հայտարարում եմ՝ մեր քարոզարշավը ոչ ոք չի հովանավորում: Քարոզարշավի ամբողջ ծախսերը իրականացվում են թիմակիցներիս ու իմ միջոցներով:  Ես տեղյակ եմ շրջանառվող լուրերին, թե իբր իմ նախընտրական շտաբը մեծ գումարներ է ծախսում քարոզարշավի վրա: Սա, իհարկե, իրականությանը չի համապատասխանում, օրինակի համար՝ մեր նախընտրական շտաբերի համար նախատեսված տարածքներից գրեթե բոլորը տրամադրվել են ընկերների  կողմից:

– Թեև համապետական ընտրություններն Արցախում 2020 թվականին են, բայց արդեն այդ ընտրություններին մասնակցելու հայտ ներկայացրած թեկնածուների միջև նկատվում է լարված պայքար, որոնցից մեկի հետ էլ կապում են Ձեզ. ըստ լուրերի՝ Ձեզ Ստեփանակերտի քաղաքապետի ընտրություններում սատարում է Արայիկ Հարությունյանը։ Ինչ կասեք այս կապակցությամբ։

-Բազմիցս ասել եմ՝ քաղաքապետի պաշտոնում առաջադրվելու որոշումը կայացրել եմ իմ թիմակիցների հետ միասին, որևէ քաղաքական ուժի անդամ չեմ, ոչ մի քաղաքական կոնկրետ ուժ ինձ չի սատարում: Ինձ սատարում են ինձ լավ ճանաչող բազմաթիվ քաղաքացիներ և ընկերներ, ովքեր, ի դեպ, տարբեր քաղաքական հայացքների տեր մարդիկ են, շատերն էլ՝ տարբեր քաղաքական կուսակցությունների անդամներ և ես շատ շնորհակալ եմ նրանց բոլորին: Ես ոչ մի սխալ բան չեմ տեսնում նրա մեջ, երբ որևէ թեկնածուի որևէ քաղաքական ուժ է աջակցում, բայց կոնկրետ իմ թիմի կողքին քաղաքական ոչ մի ուժ, կուսակցություն չկա և դա շատ լավ տեսանելի է քարոզարշավին ինձ հետ շրջող իմ թիմակիցների կազմից:

– Որևէ կուսակցության պատրաստվում եք առաջիկայում անդամակցել, հնարավո՞ր է մնալ անկուսակցական՝ մուտք գործելով քաղաքականություն։

-Որևէ քաղաքական կուսակցության չեմ պատրաստվում անդամակցել, քանի որ քաղաքապետի պաշտոնում ընտրվելու դեպքում ես ոչ թե քաղաքականությամբ, այլ քաղաքի խնդիրների լուծմամբ եմ զբաղվելու:

Աղավնի Սուքիասյան