29.04.2026 | 15:35
Բեռնատարների հայ վարորդների՝ ՌԴ-ում գտնվելու ժամկետները երկարաձգվել են
Զարուհի Փոստանջյանը համահայկական ընդվզման կոչով հանդես եկավ Եռաբլուրում
Քաղաքականություն
21.09.2017 | 12:22
Ընդդիմադիր «Երկիր Ծիրանի» կուսակցության առաջնորդ Զարուհի Փոստանջյանը գտնում է՝ ոչ թե հայ-թուրքական արձանագրություններից է պետք հրաժարվել, այլ՝ ներքին թշնամուց։
«Ամենավտանգավորը ներքին թուրքն է, իսկ ներքին թուրքը հենց Սերժ Սարգսյանն ու ՀՀԿ-ն են»,- Եռաբլուր զինվորական պանթեոնում հայտարարեց Փոստանջյանը։
Երևանի ավագանու «Երկիր Ծիրանի» խմբակցության ղեկավարը հիշեցրեց, որ վարչապետ Կարեն Կարապետյանը «Տաշիր» գրուպ ընկերությունների սեփականատեր Կարեն Կարապետյանի որդու հարսանիքին է մեկնել՝ օգտագործելով հանրային միջոցները. «Եթե քաղաքական վերնախավի ներկայացուցիչն օգտագործում է հանրային միջոցները՝ պետությանը պատկանող ինքնաթիռը, և ուղևորվում Մոսկվա ու այնտեղ հարսանիքի մասնակցում, ապա նման վերնախավն ի զորու չէ դիմագրավել մարտահրավերներին։ Հարիր չէ հայ ազգի անունից հանդես եկող անձին մասնակցել օլիգարխի որդու հարսանիքին»։
Փոստանջյանը շեշտեց՝ Արցախի հարցում զիջողական մոտեցում չի կարող լինել: «Սերժ Սարգսյանին հայտնում ենք, որ չունենք որևէ տարածք զիջելու․ կան Արցախի և Հայաստանի Հանրապետություններ, փաստացի մեկ միավոր ենք, և եկել է պահը, որ այն իրավական ձևակերպում ստանա։ Արցախը Հայաստանի մի մասն է, այդ ի՞նչն եք պատարստվում հանձնել»,- ասաց նա։
Ինչ վերաբերում է այն հարցին, թե ըստ իրեն հնարավոր է, որ 2018-ին վարչապետ լինի Սերժ Սարգսյանը, Փոստանջյանն ասաց, թե անձը կարևոր չէ՝ Սարգսյանը կլինի, թե՞ Կարապետյանը. «Առաջին հերթին գտնում ենք, որ 25 տարիների ընթացքում գործած վերնախավը չպետք է լինի կառավարման համակարգում։ Անունները եթե փոխվում են դրանից ոչինչ չի փոխվելու, պետք է ապամոնտաժել այս համակարգը»։
Առավել մանրամասն՝ տեսանյութով։
Սեդա Ղուկասյան
