18.10.2026 | 15:52
Ծանրորդ Էմմա Պողոսյանը` Եվրոպայի երիտասարդների առաջնության ոսկե մեդալակիր
Վաչե Տերտերյանն ընդունել է ՄԱԿ-ի մանկական հիմնադրամի ներկայացուցչին
Քաղաքականություն
19.08.2019 | 19:14
ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանն այսօր ընդունել է Հայաստանում ՄԱԿ-ի մանկական հիմնադրամի (ՅՈՒՆԻՍԵՖ) ներկայացուցիչ Տանյա Ռադոչային։
Վաչե Տերտերյանը ողջունել է հյուրին տարածքային կառավարման և ենթակառուցվածքների նախարարությունում ու նկատել, որ հաճախակի դարձած գործնական աշխատանքային հանդիպումները վկայում են նախարարության և հիմնադրամի միջև ձևավորված ինստիտուցիոնալ հարաբերությունների մասին։
Տանյա Ռադոչայը փոխնախարարին է ներկայացրել հիմնադրամի կողմից մեկնարկած և դեռևս մշակման փուլում գտնվող մի շարք ծրագրեր, որոնց արդյունավետ կյանքի կոչման գործում ակնկալվում է նաև ՀՀ ՏԿԵ նախարարության աջակցությունը։ Մասնավորապես` անդրադարձ է կատարվել 52 միավորված համայնքների զարգացման ծրագրերում, ինչպես նաև դպրոցական մակարդակում կլիմայի փոփոխության և բնապահպանական բաղադրիչի ներդրմանը, բնապահպանական տարատեսակ միջոցառումներին դեռահասների մասնակցության բարձրացմանը։
Զուգահեռաբար խոսվել է նաև «Երեխաների համար հարմարավետ համայնքներ» ծրագրով փոքր համայնքներում անհրաժեշտ ենթակառուցվածքների ապահովման, ինչպես նաև «Եվրոպական միությունը քաղաքացիների համար» ծրագրի շրջանակներում այլընտրանքային նախադպրոցական մոդելի մշակման և ներդրման մասին։ Վերջինիս կապակցությամբ Վաչե Տերտերյանն ընդգծել է, որ գյուղական համայնքներում նմանօրինակ այլընտրանքային մոդելների տեղայնացումն անհրաժեշտաբար պետք է համապատասխանեցվի ներհայաստանյան նորմատիվային կարգավորումներին և օրենսդրաիրավական բազային։
