Ես տեղյակ չեմ. Վարդան Սրմաքեշը՝ կարի իր արտադրամասերի շուրջ ստեղծված խնդիրների մասին. ՏԵՍԱՆՅՈՒԹ

Շվեյցարահայ գործարար, «Ֆրանկ Մյուլլեր» ընկերության ղեկավար Վարդան Սրմաքեշը տեղեկություններ չունի Գյումրիում, Արթիկում և Աշոցքում գործող իր կարի արտադրամասերի շուրջ ստեղծված խնդիրներից: Լրագրողների հետ զրույցում նա ասաց, որ դրանցով զբաղվում է իր գործընկեր Քրիստիան Գելեջին:

«Գործի մեջ ընդունված է, որ կոնֆլիկտներ են լինում: Քրիստիանն ուզում է կատարած աշխատանքով վարձատրել, իսկ աշխատակիցները ցանկանում են ժամավճարով աշխատել»,- ասաց նա:

Factor.am-ի հարցին ի պատասխան՝ Վարդան Սրմաքեշն ասաց, որ ընդհանրապես տեղեկություն չունի, որ Աշոցքի կարի արտադրամասում աշխատակիցներին ընդամենը 15 հազար դրամ են տալիս:

Խնդիրն այն է, որ Գյումրու «Սասստեքս» կարի արտադրամասի աշխատակցուհիները բողոքում էին, որ չեն ստացել իրենց ապրիլ ամսվա հասանելիք 55.000 դրամ աշխատավարձը, ոչ ոք աշխատողներին չի տեղեկացրել, որ աշխատավարձն այդ ամիս գործարքային է լինելու, իսկ տնօրինությունը աշխատողներին կամայական աշխատավարձեր է բաժանել։

«Ինձ, օրինակ, վճարել են ընդամենը 17.000 դրամ, որը չեմ վերցրել, խնդրել եմ, որ փոխանցեն իմ քարտին, որը դեռ չեն արել։ Վարձատրելիս հաշվի չեն էլ առել, ով ինչքան և ինչ ձև է աշխատել։ Ես 3-4 մեքենա եմ աշխատեցրել, գործ եմ արել՝ չհաշված վերանորոգումները, որ իմ պարտականությունը չէ, բայց արել եմ ու չեմ վճարվել։ Ինձ հասանելիք արձակուրդն էլ չի տրվել»,- ավելի վաղ Factor.am-ի հետ զրույցում ասել էր աշխատակցուհիներից մեկը:

Մանրամասները՝ տեսանյութում:

Նարեկ Կիրակոսյան