17.09.2026 | 23:38
Սամվել Կարապետյանի տնային կալանքը երկարաձգվել է
9 հազար հոգի սպասում են, որ մտնեն ՔՊ. ՀՀԿ-ից դուրս են եկել 8 հազարից ավելին
Քաղաքականություն
08.08.2019 | 20:13
Իշխող «Քաղաքացիական պայմանագիր» կուսակցությունն այս պահին ունի 2500 անդամ։ Այս մասին Factor.am-ին փոխանցում են կուսակցության լրատվության հետ կապերի բաժնից:
Հեղափոխությունից հետո 9 հազար 246 անձ ցանկացել է անդամակցել իշխող կուսակցությանը: ՔՊ-ից Factor.am-ին ասացին, որ նշյալ դիմումներից հաստատվել են ընդամենը 182-ը, իսկ մնացածը սպասման մեջ են։
Պարզվում է, որ հեղափոխությունից հետո «Քաղաքացիական պայմանագիր» կուսակցությունը նաեւ լքողներ են եղել: 2018 թվականի ապրիլից առ այսօր անդամակցության դադարեցման դիմում է ներկայացրել 16 կուսակցական, որից երկուսը՝ աշխատանքի հետ անհամատեղելիության պատճառով։
Կուսակցությանն անդամակցությունը ժամանակավոր կասեցնողներ չկան:
Հավելենք, որ հուլիսի վեցին տեղի ունեցավ ՔՊԿ համաժողովը, որի ընթացքում կուսակցության վարչության նախագահ ընտրվեց տարածքային կառավարման եւ ենթակառուցվածքների նախարար Սուրեն Պապիկյանը:
Այս տարվա ապրիլին Factor.am-ը նաեւ նախկին իշխող՝ Հայաստանի Հանրապետական կուսակցությունից էր խնդրել նույն տվյալները: Մեզ ՀՀԿ կազմակերպչական հարցերով փոխնախագահ Ռուբեն Թադեւոսյանն ասել է, որ հեղափոխությունից հետո մինչ նշված ժամանակահատվածը ՀՀԿ-ն լքել են 8 հազարից ավելի կուսակցական, իսկ անդամագրվել՝ հարյուրը:
ՀՀԿ-ից կուսակցականների հստակ թիվ չէին նշել՝ պարզաբանելով, որ հաշվարկ է կատարվում: Մամուլում պարբերաբար նշվել է, որ ՀՀԿ անդամների թիվ 120 հազարից ավել է:
Մենք փորձեցինք ՀՀԿ-ից նոր՝ առավել թարմ տվյալներ ստանալ, սակայն կուսակցությունից պատասխանեցին, որ վերահաշվարկը դեռ չի ավարտվել եւ այս պահին հստակ թիվ ասել չեն կարող։
Նարեկ Կիրակոսյան
