30.04.2026 | 20:39
Ինչ իրավիճակ է Հայաստանի ճանապարհներին
4 մլն 320 հազար դրամ՝ Հայրենական մեծ պատերազմի 30 մասնակցի առողջարանային բուժման ուղեգրեր ձեռք բերելու համար
Քաղաքականություն
08.08.2019 | 12:05
Կառավարությունն այսօրվա նիստում պահուստային ֆոնդից աշխատանքի և սոցիալական հարցերի նախարարությանը 4 մլն 320 հազար դրամ հատկացրեց: Նախարարությունն այս գումարը դրամաշնորհի պայմանագրով կհատկացնի «Հայաստանի Հանրապետության վետերանների միավորում» հասարակական կազմակերպությանը՝ Հայրենական մեծ պատերազմի 30 մասնակցի համար առողջարանային բուժման ուղեգրեր ձեռք բերելու համար:
Ըստ աշխատանքի և սոցիալական հարցերի նախարար Զարուհի Բաթոյանի՝ որոշման նախագծի ընդունումը բխում է Հայրենական մեծ պատերազմի վետերանների սոցիալական պաշտպանության, նրանց հանգստի և առողջության վերականգնման անհրաժեշտությունից, ինչպես նաև այն համապատասխանում է «Հայրենական մեծ պատերազմի վետերանների մասին» ՀՀ օրենքի 4-րդ հոդվածի երրորդ մասին դրույթներին:
Հավելենք, որ Հայրենական մեծ պատերազմի մասնակիցների թիվը հանրապետությունում, 01.05.2019թ. դրությամբ, շուրջ 350 է (համաձայն Սոցիալական ապահովության ծառայության տվյալների՝ պատվովճար ստացողներ), իսկ նրանց տարիքը՝ 93-ից 100 է: Բոլորն էլ ունեն առողջական ու սոցիալական խնդիրներ, սակայն նրանց ավելի քան 90%-ն ի վիճակի չէ ինքնուրույն առողջարան մեկնելու:
Նարեկ Կիրակոսյան
