15.10.2026 | 13:09
Սպիտակ տունը հերքում է իր առնչությունը Ուկրաինայում Starlink-ի աշխատանքի սահմանափակումներին․ Axios
Հրաչյա Ռոստոմյան. Գագիկ Ծառուկյանի ղեկավարությամբ 2013 թվականից սկսած դոպինգի օգտագործումը Հայաստանում վերացել է
19.09.2017 | 16:27
ՀԱՕԿ-ի նախաձեռնությամբ սեպտեմբերի 19-ին «Օլիմպավանում» անցկացվեց «Սպորտային բժիշկների իրազեկության բարձրացումը դոպինգի օգտագործման կանխարգելման, սննդային հավելումների օգտագործման, մարզական միջոցառումների ժամանակ անհետաձգելի բուժօգնության եւ վնասվածքների բուժման ոլորտում» թեմայով սեմինար:
Հայաստանի ազգային օլիմպիական կոմիտեի գլխավոր քարտուղար, ՀՀ սպորտի եւ երիտասարդության հարցերի նախարար Հրաչյա Ռոստոմյանը, ողջունելով սեմինարի մասնակիցներին, նշեց, որ այսօր դոպինգը դարձել է սպորտի ամենաարդիական չարիքը.
«Այսօր ամբողջ աշխարհում մեծ պայքար է ընթանում այդ չարիքի դեմ: Տեղյակ եք, որ տարբեր մարզաձեւեր այդ պատճառով վերանալու եզրին են կանգնած: Կյանքը ցույց տվեց, որ դոպինգի խնդիրն առկա է ոչ միայն նախկին ԽՍՀՄ երկրներում, այլեւ ամբղջ աշխարհում: Մենք էլ խնդիրներ ունեցել ենք: Բայց պիտի նշեմ, որ սկսած 2013 թվականից, ՀԱՕԿ-ի նախագահ Գագիկ Ծառուկյանն իր վրա վերցրեց ոլորտի վերահսկողությունը: Պարոն Արեգ Հովհաննիսյանի հետ միասին ստեղծվեց կազմակերպություն, որը համառ պայքար ծավալեց դոպինգի դեմ: Եվ դրա արդյունքում 2013 թվականից ցայսօր մենք դոպինգի հետ կապված խնդիր չունենք, բացառությամբ մեկ պատանի ըմբիշի: Անցկացված հետաքննությունն էլ պարզեց, որ այդ երեխան ինչ-որ ֆիթնես ակումբի մարզիչների խորհրդով է անծանոթ դեղահաբ օգտագործել՝ անձնական քաշն ավելացնելու նպատակով:
Ներկայումս մեր մարզիկները գրեթե երեքշաբաթյա ռեժիմով դոպինգ թեստավորում են անցնում մեր հակադոպինգային ծառայության, ՀԱՕԿ-ի, նախարարության, ՎԱԴԱ-ի եւ միջազգային ֆեդերացիաների կողմից»,- ասաց Հրաչյա Ռոստոմյանը եւ դիմելով ներկա մարզիչներին, մասնագետներին, ավելացրեց.
«Այս սեմինարը շատ կարեւոր է ձեզ համար, որպեսզի դուք, սկսած մարզադպրոցներից, ձեր սաներին ճիշտ ուղու վրա դնեք: Դուք պարտավոր եք իմանալ, որ դոպինգը ցանկացած երկրի համար խայտառակվելու կարեւոր հանգամանք է: Գիտեք, որ գերհզոր երկրներ կան, որոնց մի քանի մարզաձեւերում ընդհանրապես արգելված է մասնակցել օլիմպիական խաղերին, աշխարհի, մայրցամաքների առաջնություններին: Մեր բոլոր մարզիչներն ու մարզիկները տեղյակ են, որ դոպինգ օգտագործելու դեպքում թե´ մարզիչը, թե´ մարզիկն ուղղակի հեռանում են սպորտից: Երկրորդ տարբերակ չկա: Սա պարոն Գագիկ Ծառուկյանի՝ մարզաշխարհի ներկայացուցիչներիդ ուղղված խոսքն է, որին քաջատեղյակ եք»:
Վերջում Հրաչյա Ռոստոմյանն արդյունավետ աշխատանք մաղթեց սեմինարի մասնակիցներին:
